Zjarri që shkaktoi dy viktima në familjen Ndoj dyshohet se është shkaktuar nga shkëndija elektrike. Të paktën këto janë dyshimet e para të policisë së Pukës, e cila ka nisur hetimet për zbardhjen e ngjarjes së rëndë, ku humbën jetën bashkëshortët Petrit dhe Dava Ndoi përkatësisht 46 dhe 35 vjeç.
Ndërkohë 4 fëmijët e mitur të çiftit kanë arritur të shpëtojnë me pak lëndime, madje ato kanë shpëtuar edhe gjyshen e tyre të paralizuar.
“Më datë 8.4.2019, rreth orës 3.45 në Pukë, në banesën e shtetasit P. N ka rënë zjarr. Si pasojë e zjarrit kanë humbur jetën shtetasit P. N. 46 vjeç dhe bashkëshortja D. N. 35 vjeçe, ndërsa 4 fëmijët e tyre të moshës 15 , 13 , 12 e 11 vjeç ndodhen në Spitalin e Pukës me dëmtime të lehta.
Nga informacionet paraprake dyshohet se zjarri ka rënë për shkak të një shkëndije elektrike. Grupi hetimor po vijon veprimet në vendngjarje për sqarimin e rrethanave si dhe për përcaktimin e shkakut të zjarrit”, thuhet në një njoftim paraprak të policisë.
