Janë shumë agjensi që po punojnë në Shkodër kundër grupeve kriminale. Deklarata është bërë nga ministri i Brendshëm, Sandër Lleshaj, sipas të cilit në kryeqendrën e veriut janë marrë masa shumë të forta dhe ka një qasje të integruar.
“Do të bëhet një qasje e integruar që strukturat ende të mbijetuara të krimit në qarkun e Shkodrës të marrin një goditje nga të gjitha krahët, në mënyrë që ky fenomen dhe kjo pasiguri e krijuar për shkak të veprimtarisë së këtyre grupeve të marrë fund njëherë e mirë në Shkodër, Elbasan e gjetiu”, tha Lleshaj.
Sipas tij, referuar edhe perceprimit publik, do të merren masa të forta për të thelluar luftën ndaj grupeve kriminale që nuk janë vënë para drejtësisë për arsye se nevojitet dokumentimi i plotë i veprimtarisë kriminale.
Qyteti i Shkodrës është goditur në javët dhe muajt e fundit disa herë nga ngjarje të rënda kriminale, përfshi edhe vrasje. Në të 8 muaj numërohen 11 vrasje, ndërsa policia nuk ka mundur të zbulojë asnjë autor. Ngjarjet kriminale kanë ccuar në ndryshimin e kupolës së policisë në këtë qark.
