Bashkia e Tiranës rriti çmimin e ujit të pijshëm me 44% për qytetarët, në një tentativë, mesa duket, për të mbuluar humbjet kolosale që pësoi ndërmarrja e Ujësjellësit të kryeqytetit nga proceset gjyqësore për largim të padrejtë nga puna të rreth 150 personave.
Sipas të dhënave të një raportit të Kontrollit të Lartë të Shtetit, përllogaritet se gjatë vitit 2017, Ujësjellësi i Tiranës ka paguar mbi 700 mijë dollarë për proceset gjyqësore të humbura përballë ish-punonjësve, të larguar prej detyrës në mënyrë të padrejtë.
Në fillim të vitit 2018, Këshilli Bashkiak i Tiranës, e drejtuar nga socialistët e Erion Veliaj, miratuan rritjen e çmimit të ujit për banorët e kryeqytetit, me pretendimin e rritjes së cilësisë së shërbimit.
Por, një raport i fundit i Kontrollit të Lartë të Shtetit (KLSH), zbulon se ndërmarrja e Ujësjellës-Kanalizimeve Tiranë ka qenë në vështirë serioze në kohën që u propozua rritja e çmimit të ujit të pijshëm.
Në Raportin përfundimtar të Auditit që ka zhvilluar KLSH mbi aktivitetin e Ujësjellësit të Tiranës, një ndërmarrë në varësi të Bashkisë, ka zbuluar se si shifra kolosale, të krijuara nga pagesat e abonentëve të kryeqytetit, në fakt kanë shkuar për të paguar punonjësit e larguar padrejtësisht nga puna.
Raporti i KLSH, i përfunduar në Dhjetor 2018, konstaton se: “Në lidhje me proceset gjyqësore në të cilat shoqëria është palë e ankimuar, nga dokumentacioni i vënë në dispozicion konstatohet se për periudhën 01 Prill 2017 – 31 Dhjetor.2017, janë humbur 112 çështje gjyqësore në apel, duke e detyruar institucionin të paguajë vlerën 46,099,758.40 lekë si dëmshpërblim për ndërprerje të paligjshme të marrëdhënieve të punës dhe shpenzime përmbarimore”.
Sipas KLSH, “për periudhën 01 Janar 2018 – 31 Gusht 2018, janë humbur 53 çështje gjyqësore në apel, duke e detyruar institucionin të paguajë vlerën 32,300,969.16 lekë si dëmshpërblim për ndërprerje të paligjshme të marrëdhënieve të punës dhe shpenzime përmbarimore”.
“Në total – përllogarit Auditi i Kontrollit të Lartë të Shtetit – “për periudhën objekt auditimi janë paguar si dëmshpërblime për ndërprerje të paligjshme të marrëdhënieve të punës vlera 78,400,727.56 lekë, vlerë e cila përbën dëm ekonomik pa mundësi arkëtimi për buxhetin e shoqërisë”.
Por nuk përfundon këtu. Aktualisht janë në proces gjykimi (në Gjykatën e Apelit) edhe 39 çështje të tjera, për të cilat kërkohet vlera 17,602,000 lekë, “vlerë e cila do të rëndojnë akoma më shumë rezultatin ekonomiko-financiar të UKT”, konstaton Kontrolli i Lartë i Shtetit.
