Nga Rrogozhina, kreu i Partisë Demokratike, Lulzim Basha, tha se bashkë me largimin e qeverisë bandë të Ramës, do të largohen edhe oligarkët që janë bërë milionerë dhe miliarderë në kurriz të shqiptarëve.
“Pasuritë e vëna nga djersa dhe gjaku i shqiptarëve do të konfiskohen, ndërsa oligarkët që kanë përfituar konçensionet korruptive do të përballen me ligjin. Pasuritë dhe paratë e tyre do t’u kthehen qytetarëve. Do të varrosim njëherë e mirë fenomenin e Edi Ramën, pushtetarit batakçi, pushtetarit të lidhur me krimin, pushtetarit që futen në xhepat e çdo shqiptari për të pasuruar një grup njerëzish të lidhur me të”, tha Basha.
Sipas tij, varrosja e këtij modeli, do të bëjë që askush nuk do të mund të marrë më peng Shqipërinë, institucionet dhe shqiptarët.
“Do ndryshojmë sistemin, do t’i japim fund drejtësisë që mbron njerëzit e pushtetshëm, edhe kur ata kapen duke vjedhur milionat e shqiptarëve.
Drejtësia do të çojë në burg politikanët e korruptuar dhe të lidhur me krimin.
Deputetët e ardhshëm të Kuvendit të Shqipërisë nuk do të përcaktohen më në mënyrë misterioze, anonime apo nga njeri, por ata do e kenë fatin të lidhur me qytetarët, do të jeni ju që do të përcaktoni me votë deputetët e ardhshëm”, tha Basha.
Ai shtoi se ne jemi sot shumica dhe do të marshojmë drejt fitores për të gjithë shqiptarët, që do të thotë se politikanët e korruptuar që ju kanë zhvatur do të përballen me drejtësinë.
