Lulzim Basha, kryetar i PD-së, zhvilloi sot takime me fermerë në Rrogozhinë dhe Luz të Kavajës, ku edhe paraqiti një pjesë të programit të PD-së në mbështetje të tyre.
Basha foli për miliona euro që PD do të mbështesë fermerët, duke premtuar se me subvencionet që do të akordohen ato do të jenë më të mbështeturit në të gjithë Ballkanin.
Por duket se premtimet e Bashës ka nxehur nënkryeministrin Erjon Braçe, i cili ka reaguar në një postim në rrjet.
Braçe shkruan se Basha dhe një prej të pranishëmve kishte gënjyer kur thoshte se nuk kishte kanale kullimi.
“Ti jo vetëm që nuk di, por ke një takëm mashtruesish! E dëgjove ç’të tha ai bujku? Nuk kemi kullim! Pse ua fsheh atyre njerëzve që përgjegjës për kullimin është kryetari yt i Kavajës që shihte gishtat, dhe ai i Rrogozhinës që nuk e pashë aty?! Shko në punë Lylzim, shko në punë!”, shkruan Braçe.
Por në postimin e tij, Braçe nuk merret çështjet e tjera të ngritura nga fermerët që nisin me çmimin e karburantit, mungesën e tregut për prodhimet e tyre, uljen e subvencioneve etj.
