Fermerët në Bujqës–Jagodinë, Elbasan, po përballen me një situatë të rëndë, pasi kultura e specit është prekur masivisht nga një insekt i njohur si “miza e bardhë”.
Osman Sula, një fermer me 2 hektarë sera, tregon se prodhimi është i dëmtuar dhe nuk arrin të shitet as në tregun vendas, as në eksport.
“Unë kam 15 dynym me spec, të mbjellë nga dora e parë, ndërsa ky që jemi këtu është i dorës së dytë. Problemi më i madh është një mizë e bardhë, të cilën e kemi luftuar dhjetëra herë, por nuk arrijmë dot ta zhdukim. Kjo mizë bën që speci të mos lidhet, ose edhe kur lidhet, fruti dëmtohet. Ja, kështu e bën frutin – ky nuk shitet as në eksport, as në tregun vendas dhe as vetë nuk e përdorim dot. Dhe shqetësimi ynë është që shpenzimet janë shumë të mëdha dhe bima nuk jep efekt.” – Osman Sula, fermer.
Fermeri thotë se nuk ka arritur të vjelë asnjë kilogram këtë sezon, ndërsa humbjet janë aq të mëdha sa nuk nxjerrin dot as shpenzimet.
“Nuk nxjerrim dot as shpenzimin e fidanit që kemi blerë, sepse nuk arrijmë të shesim. Të gjithë banorët e zonës sonë janë prekur nga kjo situatë dhe më duket se është problem në të gjithë Shqipërinë. Prandaj shteti duhet të vërë dorë dhe të sigurojë ilaçe të sakta, sepse edhe në Evropë, po nuk pati ilaçe të mira për ta izoluar këtë sëmundje, nuk ia dalin dot. Unë personalisht ndihem i falimentuar. Familja ime merret vetëm me bujqësi, kam dy hektarë sera të mbjella, por nuk kam shitur asnjë frut.” – Osman Sula, fermer.
Situata e krijuar nga miza e bardhë po e kthen sezonin bujqësor në një sfidë të vështirë për fermerët, të cilët kërkojnë ndërhyrje urgjente nga shteti./EuronewsAlbania
