Opozita pritet të organizojë këtë javë dy protesta, një prej të cilave është paracaktuar më 13 prill, ndërsa tjetra është në varësi të mbledhjes së Kuvendit në seancë plenare.
Protesta e 13 prillit do të mbahet në orët e pasdites para kryeministrisë, ndërsa ende nuk ka një skenar të qartë sesi do të zhvillohet ajo.
Burime nga opozita shprehen se nuk përjashtohet mundësia që protestuesit të vendosin të qëndrojnë në bulevard përgjatë orëve të natës, duke qenë se fillimi i protestës do të jetë ora 18:00.
Ndërkohë protesta tjetër është në varësi të zhvillimit të seancës parlamentare. Opozita ka vendosur që të zhvillojë protesta para Kuvendit sa herë ka seanca parlamentare, gjë që do të ndodhë edhe këtë javë nëse Parlamenti do të mblidhet.
Strukturat e partive opozitare kanë përqëndruar vëmendjen në protestën e 13 prillit, e cila pason ato të 16 shkurtit dhe 16 marsit, dy prej tubimeve më të mëdha të organizuar nga opozita.
Sot pasdite në selinë e PD-së, kreu demokrat Lulzim Basha do të zhvillojë një takim me strukturat e PD-së në Tiranë. Përveç drejtuesve të degëve të kësaj partie në kryeqytet, janë ftuar të marrin pjesë edhe sekretarët dhe kryetarët e grupseksioneve.
Burimet shprehen se në këtë mbledhje, që do të mbahet në orët e pasdites, pritet që strukturave në Tiranë t’u bëhet e ditur udhëzimi mbi protestën e 13 prillit.
Mësohet se masiviteti dhe qëndresa pritet të jenë dy porositë që Basha do të kërkojë nga strukturat e degës më të madhe të PD-së, ndërsa në vijim do të ketë një koordinim me strukturat e partive të tjera opozitare.
Pritet që gjatë javës drejtuesit e partive opozitare të zhvillojnë një takim, ku pritet të përcaktojnë strategjinë që do të ndjekin.
Protesta e 13 prillit shihet edhe si një testim i mbështetjes së kauzës së opozitës, e cila prej 45 ditësh ka dorëzuar edhe mandatet e deputetëve dhe ka deklaruar se nuk do të hyjë në zgjedhje, përfshi edhe ato vendore, përsa kohë kryeministër do të jetë Edi Rama./BN/
