Nëse zgjedhjet lokale do të bëhen sot Partia Socialiste do të fitojnë 44 %, PD 39 %, LSI 14 % dhe parti të tjera 3 %. Marzhi i gabimit në këtë sondazh llogaritet në 3 %.
Këto janë të dhënat e sondazhit të publikuar nga IPR Marketing, ku ka pasur një përplasje shifrash lidhur me situatën social-ekonomike, atë politike, vlerësimin e punës së qeverisë dhe dëshirën e shqiptarëve për t´u larguar nga Shqipëria.
Grupmoshat që janë përfshirë në sondazh janë 18-24 vjeç, ndërsa si kampion janë marrë 2 mijë qytetarë në zona të ndryshme të vendit.
Pro zgjedhjeve të parakohshme janë shprehur 28.9 %, ndërsa kundër 51.9 % dhe 19.2% e të anketuarve shprehen nuk e di.
Lidhur me dorëzimin e mandateve të deputetëve nga opozita, 18. 7 % e vlerësojnë positive, 61.1% negative dhe 20.2% e të anketuarve shprehen nuk e di.
55.4 % e të anketuarve cilësojnë përgjegjësi si të opozitës ashtu edhe të qeverisë mos hapjen e negociatave në qershor. Ndërkohë që 60.3 % e të anketuarve shprehen në favor të një sistemi mazhoritar me lista të hapura, ndërsa për sistemin aktual shprehen 13.3 %.
Lidhur me pasardhësin e Edi Ramës në krye të PS-së, Erjon Veliaj shihet si lideri i ardhshëm i socialistëve, ndërsa pro shprehen 56.1 % e të anketuarve, ndërsa 16.1 % shprehen kundër.
Ndërkohë nëse zgjedhjet vendore do të realizohen në 30 qershor, pjesëmarrës do të jenë 45.6 % e të anketuarve.
Papunësia, korrupsioni dhe varfëria janë 3 problemet e evidentuara nga sondazhi, i cili është në nivel kombëtar.
62.5 % e të anketuarve janë shprehur se duan të largohen nga Shqipëria, ndërsa 35.1 % janë shprehur se duan të qëndrojnë në Shqipëri. Pjesa tjetër janë shprehur se nuk e dinë se çfarë duan të bëjnë.
Kur vjen puna për të gjykuar veprimtarinë e qeverisë dhe të kryeministrit Rama, 29.5% e tyre mendojnë se veprimtaria e kryeministrit Rama dhe qeverisë është pozitive, ndërsa 34.7% janë shprehur negativisht. 28.5% e shqiptarëve janë shprehur asnjëanës, për punën e qeverisë. Një grup prej 7.2% janë shprehur se nuk dinë të gjykojnë veprimtarinë e qeverisë.
Veprimtarinë e kryetares së LSI, Monika Kryemadhi 57.2% të shqiptarëve e kanë vlerësuar negativisht. 8.2 % e tyre mendojnë se puna dhe veprimtaria e Kryemadhit janë pozitive. 22.7% mendojnë as pozitivisht dhe as negativisht, ndërsa 11.9% thonë se nuk e dinë.
Punën dhe veprimtarinë e kreut të PD, Lulzim Basha shumica e shqiptarëve e kanë gjykuar negative. Janë 49.3% e tyre që gjykojnë negativisht veprimtarinë e Bashës, ndërsa 13.7% e shqiptarëve mendojnë pozitivisht për veprimtarinë e PD dhe liderit të saj. 28.6 % mendojnë se puna e Bashës është as pozitive dhe as negative. Ndërsa 8.3% janë shprehur se nuk e dinë.
Pyetjes sesi jetohet në Shqipëri, 34 % e shqiptarëve janë përgjigjur pozitivisht, ndërsa 59.7% mendojnë se në Shqipëri nuk jetohet mirë. Ndërsa 5.5% janë përgjigjur nuk e di.
Duke bërë një krahasim me 3 vite më parë, 18.5% mendojnë se jetohet më mirë, ndërsa 39.7% mendojnë se në Shqipëri jetohet më keq. Janë 40.5 % e shqiptarëve që mendojnë se jetohet njësoj si para 3 vitesh. 1.2 % janë përgjigjur “nuk e di”.
Sipas sondazhit të IPR Marketing, janë 40.8% e qytetarëve shqiptarë që mendojnë se Shqipëria po shkon në drejtimin e duhur. Ndërsa 49.0% thonë se vendi po shkon në drejtimin e gabuar. 10.2% thonë se nuk e dinë.
Krimi si një çështje që ka trazuar shoqërinë, por edhe klimën politike vazhdon të jetë problem për qytetarët shqiptarë. Krahasuar me 3 vitet e fundit, 53.4% e shqiptarëve mendojnë se krimi në vend është rritur. Të paktë janë ata që mendojnë të kundërtën, ku 17.0% mendojnë se ky fenomen ka pësua rënie. Janë 23.6% e shqiptarëve që mendojnë se krimi është po në të njëjtat nivele si para 3 vitesh. Ndërsa 5.9 % thonë se nuk e dinë nëse është rritur apo ka rënë.
Emigracioni është një fenomen që në Shqipëri ka ardhur në rritje. Sipas sondazhit të IPR Marketing të publikuar në RTV ORA, janë 62.2% e shqiptarëve që duan të largoheshin nëse do t’i jepej mundësia. 35.1% janë përgjigjur se do të qëndrojnë në Shqipëri dhe 2.8 % kanë thënë: “nuk e di”.
Shqiptarët mendojnë se ekonomia shqiptare nuk është përmirësuar në 3 vitet e fundit. Sipas sondazhit të IPR Marketing, 20.9% e shqiptarëve mendojnë se ekonomia është përmirësuar, ndërsa 43.3 % mendojnë se ekonomia shqiptarë është përkeqësuar. 34.7% e qytetarëve mendojnë se ekonomia është njësoj si para 3 vitesh. Ndërsa 1.1% janë përgjigjur nuk e di.
