Ish-deputeti i LSI-së, Endrit Braimllari ishte i ftuar mëngjesin e sotëm në emisionin 7 pa 5 në Vizion Plus për të folur mbi aktualitetin politik dhe vazhdimësinë e protestave.
I pyetur mbi mbështetjen e qytetarëve për protestat që priten në vazhdim Braimllari u shpreh se protestat do të kenë gjithmonë e më shumë përkrahjen e qytetarëve, duke theksuar se protesta e 13 prillit do të jetë jashtëzakonisht masive dhe do të bashkojë të gjitha shtresat e shoqërisë.
“Të jeni të bindur që protestat kanë gjithmonë e më shumë përkrahje qytetare. Protesta e 13 prillit do të jetë jashtëzakonisht shumë masive për sa i përket qytetarëve, sepse do bashkohen të gjithë shtresat e shoqërisë. Sot nuk po proteston opozita, sot po protestojnë qytetarët. Ato fermerë që dalin në Lushnje, bllokojnë rrugën dhe derdhin qumështin nuk janë anëtarë të LSI-së apo të Partisë Demokratike. Janë fermerë. Sot të gjitha shtresat e shoqërisë janë në protestë, sepse protesta është ekonomikë. Protesta ka të bëjë me realitetin që po kalon Shqipëria. Pra me varfërinë, me mungesën e vendeve të punës, me taksat e larta, me ushtrimin e presionit ku biznesin nuk e shikon si partner për të zhvilluar ekonominë dhe për të hapur vende pune, por e shikon si një mjet për ta rrjepur. Nuk investon Edi Rama në bujqësi, sepse po të investojë në bujqësi do të hapë edhe vende të reja pune, po e shkatërron bujqësinë. Po shkatërron kudo. Ato fermerë që derdhin qumështin, mbyllin fermat, mbyllin vende pune.”– u shpreh Braimllari.
Gjithashtu i pyetur nëse pritet që zgjidhja të vijë nga faktorë të jashtëm, duke e lidhur edhe me faktin se pritet që në ditët në vazhdim në Tiranë të vijnë zyrtarë të rëndësishëm nga jashtë, Sekretari i Përgjithshëm i LSI-së, u shpreh se:
“Opozita është e qartë në qëndrimin e saj. Ne kërkojmë qeveri tranzitore për t’i hapur rrugën zgjedhjeve të lira dhe të ndershme. Sepse Edi Rama është faktuar publikisht me prova të regjistruara nga Prokuroria shqiptare dhe të bëra publike nga Zëri i Amerikës, që ka deformuar vullnetin e shqiptarëve, ku eksponentë të rëndësishëm të Partisë Socialiste kanë lidhje të drejtë për drejtë me krimin e organizuar, për të ushtruar presion me qëllim që të deformojnë votën, atë çka ne e kemi thënë në zgjedhjet e 2017. Ka një video me zë dhe figurë të Edi Ramës që i bën thirrje Policisë së Shtetit, të heqë kapelet dhe të bëjë fushatë për Partinë Socialiste. Kemi të bëjmë me raporte të herë pas hershme të Departamentit Amerikan të Shtetit që e cilëson qartazi blerjen e votës, e cilëson qartazi në raport mungesën e pandëshkueshmërisë në këtë vend, pra mungesën e zbatimit të ligjit nga ana e qeverisë. Ky është komunikimi zyrtar i Shteteve të Bashkuara të Amerikës, Departamenti Amerikan i Shtetit. Dhe ky raport e thotë qartë. Pra në këto kushte Edi Rama nuk e ka më legjitimitetin për të drejtuar këtë qeveri dhe nuk ka më besimin popullor për të bërë zgjedhje të lira dhe të ndershme. Nuk i bën dot, sepse është provuar që ky njeri e deformon vullnetin. Dhe ajo çka është më e rëndësishme është që kjo qeveri që e drejton Edi Rama, me këto ministra nuk janë më të fokusuar tek interesi publik, por tek interesi personal.”
