Ledian Memushaj ka shënuar një gol spektakolar për Pescaran mbrëmjen e sotme, në përballjen me Palermon. Mesfushori i kombëtares shqiptare ka shënuar golin e barazimit për ekipin e tij, në kohën që Palermo udhëhiqte me rezultatin 1-2.
Në minutën e 69` të takimit, Memushaj rikuperon një top jashtë zone, dhe pasi kalon një nga lojtarët kundërshtar godet duke shënuar një euro gol. Fantastik mesfushori vlonjat, që me golin e sotëm konfirmojë dhe njëherë se është shndërruar në lider te Pescara.
Më herët skuadra e tij shënoi në minutën e 6`, duke kaluar në avantazh me Del Grosso, por barazimi i miqve erdhi në minutën e 15` me Moreo. Në të 37` Palermo kalon në avantazh me Pirrello, ndërsa goli i futbollistit të kombëtares shqiptare vendosi barazpeshën në pjesën e dytë.
Mirëpo vendasit nuk ndalen me kaq, pasi hidhen sërish në sulm dhe realizojnë përsëri katër minuta para përfundimit të kohës së rregullt. Në të 86` ishte Scognamiglio ai që realizoi golin e fitores për skuadrën e tij.
Me fitoren e sotme Pescara ngjitet në vendin e pestë në renditje, dy më pak se Palermo e vendit të tretë. Skuadra e Memushajt ndodhet në zonën e play-off në Serinë B.
https://www.youtube.com/watch?v=ztwJP7VPGFY
