Rreth 1300 forca policore janë angazhuar për të mbrojtur Parlamentin dhe zonës pranë tij.
Ashtu si në protestat e tjera, janë angazhuar edhe forcat e FNSH dhe repartet Shqiponja, ndërsa policët që përbëjnë edhe rreshtin e parë, janë të pajisur me kundragaz.
Në dallim nga protestat e mëparshme, policia ka zgjeruar zonën që mban nën kontroll, duke synuar në këtë mënyrë që t’i mbajë sa më larg protestuesit jo vetëm godinës së Kuvendit, por edhe rrugëve që kalojnë ligjvënësit për të hyrë në selinë e Parlamentit.
Protestuesit ndodhen në të dy anët e Pedonales, e cila është tërësisht e bllokuar nga policia, dhe atje mund të kalojnë vetëm zyrtarët e Ministrisë së Brendshme apo deputetët.
Në hyrje të pedonales, nga ana e bulevardit “Dëshmorët e Kombit”, ka pasur edhe një përplasje mes protestuesve.
Në rend ditë janë tre pika, ku vlen të theksohet prezantimi i raportit vjetor të KQZ-së nga kryetari Klement Zguri. Po sot do të bëjë betimin dhe deputetja më e re Amra Barova që ka marrë mandatin e deputetit të LSI-së në qarkun e Shkodrës, duke çuar në 99 numrin e deputetëve. Po kështu dy kandidatë të tjerë të opozitës kanë dorëzuar formularin e dekriminalizimit në KQZ për marrjen e mandatit. Së bashku me dy të fundit, numri i deputetëve në Kuvend arrin në 101.
