11 të vrarë në 8 muaj, por Veliu habit: Shkodrën e kemi në kontroll, ja pse u vendos Brahimaj

Ardi Veliu, Drejtori i Përgjithshëm i Policisë së Shtetit, tha mbrëmjen e sotme se detyra e tij është jot ë jetë në ekranet televizive, por të ndihmojë dhe mbështesë punonjësit e policisë, që punojnë 24 orë në ditë në 7 ditët që ka java.

I ftuar në “A Show”, Veliu theksoi se në qarkun e Shkodrës ka pasur një ndërthurje mes ngjarjeve të grupeve kriminale me ato të gjakmarrjes.

“Thuhet se në Shkodër ka një situatë të rënduar të kriminalitetit, por në këtë qark kanë ndodhur vetëm 7 % e veprave penale të evidentuara.

Për vitin 2018, janë kapur 99 armë, ndërsa në total janë kapur 546 armë në total.

Drejtori i Policisë së Shkodrës lëvizi sepse duam t’i japim një impuls punës atje. Policia e Shtetit është në gjendje të kontrollojë çdo zonë në Shkodër, pra kemi kontroll të plotë mbi situatën”, tha Veliu.

Sipas tij, nga ngjarjet kriminale të ndodhura në Shkodër 4 janë të zbuluara dhe 5 të pazbuluara.

Por Drejtori i Përgjithshëm i Policisë nuk dha një shpjegim sepse gjatë 8 muajve të fundit në qarkun e Shkodrës kanë ndodhur 11 vrasje.

Veliu shprehu besim të plotë për drejtorin e ri të Policisë së Shkodrës, Niko Brahimaj, duke e cilësuar një officer karriere dhe të aftë për të dhënë impulse të reja. Veliu tha se zgjedhja e Brahimajt ishte kolegjiale, por mohoi që për emërimin e tij të kishte vënë veton ministri i Brendshëm.

LEXO EDHE  Denoncimi i fortë/ Në administratë nuk punësohesh nëse nuk je i FRESSH

Në vijim ai shtoi se në Shkodër, muajin e kaluar u arrestua grupi që stimulonte fajdet, i cili është një fenomen i gjithëpërhapur në 28 vite në këtë qark.

Veliu u pyet mbi familjet që mund të konsiderohen kriminale, ndërsa tha se një grup criminal është goditur, ndërsa të tjera grupe kriminale janë nën hetim.

“Ende nuk është maturuar koha për të goditur këto grupe, pasi duhen materializuar provat, që më pas çohen në prokurori”, tha Veliu, pa dhënë një shifër sesa grupe kriminale veprojnë në këtë qark.

Veliu tha se policia ka të gjithë kapacitetet për të dominuar dhe kontrolluar situatën në Shkodër.

“Duke bërë një krahasim nga 2004  deri në 2018, mund t’ju them se vitin e kaluar në Shkodër janë kryer vetëm 9 vrasje, ndërkohë që në 2012 kishte 18 të tilla”, tha Veliu.

Sipas tij, në Shkodër qytetarët ngurojnë të japin një informacion apo të bashkëpunojnë me policinë.

“I bëj thirrje qytetarëve që të japing kontributin e tyre kur konstatojnë çdo lloj shkelje, le ta denoncojnë, le ta provojnë”, tha ai.