Nga Boldnews.al
Nxitimi i Policisë së Fatmir Xhafaj dhe Prokurorisë së Donika Prelës për të realizuar operacionin e paplotë, por me nuanca show, të njohur me emrin “Vol-vo4”, u ka lënë hapësirë grupeve kriminale në Shkodër që të vijojnë serinë e përgjakshme të vrasjeve në qytetin verior, me viktimat e radhës të shënuara paraditen e kësaj të shtune.
Astrit dhe Brahim Bilali i shtohen bilancit të rëndë të atentateve, ndërkohë që Policia dhe Prokuroria lokale thjesht numërojnë viktimat dhe i shndërrojnë në statistika.
Në Tetor 2018, Fatmir Xhafaj dhe Donika Prela u vunë në krye të operacionit, ku u arrestuan disa eksponentë të rëndësishëm të grupit ‘Bajri”, një prej më të zhurmshmëve në Shkodër.
Pas këtij operacioni, Policia dhe Prokuroria për Krime të Rënda deklaruan triumfator se shkatërruan bandën kriminale dhe i dhanë fund vrasjeve në qendër të qytetit.
Por, realiteti është ndryshe. Të arrestuarit e grupit “Bajri” nuk akuzohen për përfshirjen në serinë e përgjakshme të vrasjeve të muajve të fundit, pavarësisht se Policia dhe Prokuroria i akuzon ata në deklarata mediatike si pjesë e këtij zinxhiri të përgjakshëm.
Deri më tani, “Bajrat” nuk akuzohen zyrtarisht për vrasjet e vitit 2018 dhe 2019. Gjithashtu, edhe për “rivalët” e tyre nuk ka asnjë akuzë zyrtare nga institucionet shtetërore, ndërkohë që atentate me viktima janë shndërruar në një ‘rutinë” të përmuajshme në Shkodër.
Burime nga Policia e Shkodrës deklaruan për “Boldnews.al” se ndërhyrja “spektakolare” e Tetorit 2018 ishte thjesht një show që u nevojitej drejtuesve të lartë të Ministrisë së Brendshme dhe të Prokurorisë Shqiptare.
Madje, të njëjtat burime hedhin dyshime edhe për “nxitim të qëllimshëm” në rastin e ndërhyrjes, në kohën kur agjentët në terren po punonin për dokumentimin me prova të autorëve të vrasjeve.
Por, arrestimi i parakohshëm i një pjese të grupit “Bajri” dëmtoi rëndë hetimet në zhvillim, të cilat kishin në fokus pikërisht serinë e atentateve.
Aktualisht, Bajrat dhe persona të tjerë, gjenden në qeli nën akuzat e trafikut të narkotikëve, përkundër pretendimeve publike të Policisë dhe Prokurorisë se ata mund të jenë agresorë dhe njëkohësisht objektiv i atentateve me viktima.
Punonjës të Policisë së Shkodrës deklarojnë në mënyrë konfidenciale se institucionet ligjzbatuese në qytet janë “të paralizuara” për hetimin e kësaj serie ngjarjesh kriminale.
Shkodra sot vuan largimin e bizneseve të mëdha. Kjo u ka krijuar bandave lokale kriminale që të përfshihen në një luftë për territore. Zyrtarët policorë dhe të Prokurorisë, ashtu si edhe qytetarët e Shkodrës, janë në dijeni të plotë të personave të përfshirë.
Por, për shkak të frikës, neglizhencës dhe paaftësisë së institucioneve hetimore, gjendja e kriminalitetit në kryeqendrën e Veriut vijon të jetë shumë e rënduar.
Prokuroria e Shkodrës, e drejtuar nga Ylli Pjetërnikaj, ka shkëlqyer në dështimin e saj. Prej më shumë se një viti, kur Pjetërnikaj është në krye të organit hetimor të Shkodrës, nuk është zbuluar asnjë prej autorëve të ngjarjeve të rënda kriminale.
