Astrit dhe Brahim Bilali u qëlluan për vdekje sot në mëngjes në Shkodër, ndërsa ngjarja ka ndodhur pranë banesave të tyre në lagjen Kiras.
Dyshimet janë se ata u qëlluan nga një automjet që më pas është gjetur i djegur nga policia.
Burimet policore bëjnë me dije se autorët ishin të maskuar, ndërsa kanë nisur hetimet për zbardhjen e ngjarjes.
Dyshohet se automjeti që u gjet i djegur në Livadhe ishte i vjedhur dhe me targa false.
Astrit Bilali i ekzekutuar sot, është babai i boksierit të njohur Asmer Bilali, i arrestuar në Tiranë vetëm pak kohë më parë, si pjesë e grupit kriminal Bajri.
Asmer Bilali u bë i njohur si i përfshirë në grupet kriminale në Shkodër në 10 Gusht të vitit 2018, kur mbeti i vrarë Arjan Ferracaku teksa kalëronte. Resorti i kuajve ku u bë atentati është në pronësi të babait të Asmerit, Astritit, i cili mbeti i vrarë në një atentat sot.
Ferracaku dhe Asmer Bilali ishin të afërt dhe dilnin shpesh për hipizëm pasi ishin të apasionuar pas kuajve. Asmer Bilali ishte i pranishëm në momentin e ekzekutimit të biznesmenit Ferracaku me breshëri plumbash dhe policia hodhi atëherë dyshime të forta se në fakt atentatati ishte porositur pikërisht për Bilalin.
