Nga Boldnews.al
Ish-ministri i Brendshëm Fatmir Xhafaj, që nga largimi nga posti i lartë vetëm dy herë është shfaqur në fjalime në Parlament, por ditën e sotme e shkundi mirë sallën, duke krijuar përshpërima mes deputetëve të mazhorancën me pyetjen: ku do të dalë ky?
Xhafaj kritikoi ndryshimet ligjore për vettingun në Policinë e Shtetit dhe Gardën e Republikës, një iniciativë e marrë pak ditë më parë nga ministri aktual Sandër Lleshaj. Gjenerali bëri lëvizjen e beftë, duke ia dhënë kompetencat SHÇBA-së për të kryer spastrimin në radhët e policisë.
“Dikush mund të thotë se vettingu në polici është paranojë e ish-ministrit të brendshëm. Jam i keqardhur që ligji nuk u bë i zbatueshëm për dy vjet. Nuk është herezi ndryshimi i një ligji. Nuk besoj se ndryshimet janë të duhura. Vetingu nuk mund të bëhet nga SHÇBA. Cënohet cilësia dhe shpejtësia e vetë procesit, por SHÇBA nuk ka kapacitetet e duhura për ta bërë vettingun”, deklaroi Xhafaj.
Sipas tij, kjo do ngadalesojë procesin e nisur, të ngjashëm me atë të reformës në drejtësi. Ngecja e vettingut në radhët e strukturave të rendit, më shumë se për mungesë kapacitetesh verifikuese është një taktikë politike, për ta kontrolluar nëpërmjet një dore të gjithë procesin, siç është struktura e SHÇBA-së (Shërbimi i Çështjeve të Brendshme dhe Ankesave).
“Argumenti financiar nuk është i justifikuar. Për më tepër që ka shumë pasuri të sekuestruara nga policia, – u shpreh Xhafaj, ndërsa mbylli falën e tij në parlament duke theksuar se: “Jam njeri i ligjit dhe do pres me durim veprimet dhe vendimet e institucioneve të vendit tim”.
Po çfarë e bëri Xhafajn të dalë nga “vetja” dhe me argumente ligjore të sulmonte direkt ministrin aktual, pasardhësin e tij Sandër Lleshaj? Ish-ministri Xhafaj erdhi në këtë detyrë për të përmirësuar imazhin e lënë nga Saimir Tahiri, sot i pandehur për akuzën e trafikut ndërkombëtar të lëndëve narkotike në kuadër të grupit të strukturuar kriminal. E megjithatë, edhe Xhafaj iku po aq i njollosur, pasi vëllai Agron (Geron) u dënua me vendim të formës së prerë nga gjykatat italiane për trafik ndërkombëtar të drogës. Njëkohësisht u publikua edhe një audiopërgjim ky flitej për trafik kanabisi nga Vlora drejt Italisë.
Padyshim që Xhafaj do të donte të vijonte detyrën, por Rama ia shkurtoi ditët, për të shpëtuar veten. Përplasja mes Xhafajt dhe Lleshajt, edhe pse po shitet si “debat ligjor”, po kthehet në rivalitet, mes Rilindjes dhe PS-së.
Xhafaj po tenton të mbajë linjën e fortë të PS-së të gërshetuar me mbështetje mëse hibride si Lali Eri i Bashkisë Tiranë, ndërsa pala tjetër, përfshi edhe ministrin Sandër Lleshaj tashmë janë idhtarë të Rilindjes dhe kryeministrit Edi Rama. Lufta brenda llojit është e ndarë më dysh, njëra që kërkon të hajë “kokën e Ramës” me Xhafajn dhe shokë dhe tjetra që mbron Ramën, ministrat dhe aureola tjetër që përfaqësohet me konceptin Rilindje.
