Kryeministri Edi Rama shprehu shqetësim sot lidhur me pasqyrimin në mediat ndërkombëtare të protestave të opozitës.
Rama nuk kurseu akuzat ndaj mediave ndërkombëtare, që sipas tij janë njëlloj si kadrinjtë e Shqipërisë.
“Eurokadrinjtë ngjajnë shumë me kadrinjtë tanë. Një tufë njerëzish nga bashkitë e Shkodrës, Lezhës, kamzës, bashkë me Dashon e Lazaratit hodhën bojë mbi Ministrinë e Brendshme, për të xhiruar pamjet që bëjnë më pas xhiron nëpër botë, duke u marë nga eurokadrinjtë që duan lajme sensacionale.
PD është shndërruar në një grup endacakësh që vijnë rrotull, që kërkojnë pushtetin, duke kërkuar njerëz të dëshpëruar, të rinj rrugëhumbur, që duke vënë kapuçin në kokë, dhe të inkurajuar nga muzika e filmit Skënderbeu dhe nga Flamuri i Kukësit, qëllojnë mbi policinë.
Boja në muret e ministrisë do të përthithet nga mediat ndërkombëtare, duke nxirë imazhin e Shqipërisë”, tha Rama.
Kryeministri tha se ata kanë zgjedhur rrugën dhe do të mbeten në rrugë, ndërsa ne do të vijojmë rrugën që kemi marë përsipër për të udhëhequr shqiptarët.
“Opozita është e dëshpëruar dhe e pashpresë. Nga mitingu në miting, endacakët thonë hajdeni se tani do të ndodhë ajo që nuk ndodhi herën e kaluar.
Por ja ku ju them, asnjë gjë nuk do të ndodhë, përveç asaj që ata do të rrudhen edhe më tej”, tha Rama.
