Kreu i FRD-së Bamir Topi, si ish-aleat i Ramës në zgjedhjet e fundit lokale, ndërsa ka komentuar krizën politike në vend, ka deklaruar se djegia e mandateve ishte një veprim ekstrem, por i detyruar nga sjellja e mazhorancës.
I ftuar në Ora News, Topi deklaroi, se e vetmja zgjidhje për ti dhënë fund krizës politike në vend, janë zgjedhjet e parakohshme.
‘Djegia e mandateve është një veprim ekstrem i opozitës, por për hir të së vërtetës edhe i detyruar për të marrë këtë vendim ekstrem.
Për ne qe kemi disa vite në politikë, i kuptojmë për ato çfarë shprehin por dhe për ato që nuk shprehin. Kjo politikë duhet ta mbyllë ciklin e vet, kjo nuk është një politikë perëndimore.
Kryeministri nuk ka prishur thjesht marrëdhëniet me opozitën parlamentare, por i ka prishur marrëdhëniet në shumë drejtime dhe duket që ende nuk e ka frenuar turravrapin e tij.
Zgjidhja e krizës është e vështirë, është një i sëmurë në reanimacion, për fat të keq sepse nuk është thjesht politika e sëmurë por është shteti i sëmurë, sepse politika e ka lënë shtetin pa institucione. Jo vetëm nuk ka institucione por nuk ka shpresë që kjo marrëdhënie të normalizohet. Shoh dhe një suporti të dobët nga politika europiane sepse kanë hallet e tyre dhe janë stërlodhur me këta politikanë.
Edhe nëse Rama pranon zgjedhje të parakohshme duhet të shtrojmë pyetjen A janë krijuar kushte normale që populli të jetë i motivuar për të votuar. Këtu mungon një meakulpa që të bën të pashpresë. Edhe zgjedhjet e parakohshme, une do të thoja me gojën plot dhe me kokën lart, detyrimisht që duhet të ketë zgjedhje të parakohshme, por zgjedhje të parakohshme duke vendosur rregullat e lojës, sepse rregullat e lojës nuk mund të jenë për Ramën, Bashën apo Monikën, por rregullat e lojës janë për të gjithë’, deklaroi Topi.
