Nga Boldnews.al
Kryeministri Edi Rama foli sot për ndryshime në Kodin Penal me qëllim dënimin e kujtdo që ushtron dhunë apo godet funksionarët. Propozimi nuk ka të bëjë shumë me mbrojtjen e mjekëve, por me funksionarët, ministra e deputetë në sallën e Kuvendit.
Ndërsa i cilësoi si barbarë ata deputetë që i turren foltores në Kuvend apo vendeve ku qëndrojnë ministrat, Rama tha: “nuk mundet deputeti të këtë imunitet në Parlament për të goditur fizikisht deputetin. Nuk mundet deputeti të ketë imunitet në Parlament për t’iu turrur foltores apo tryezës së qeverisë fizikisht. Edhe kjo duhet të përfshihet në Kodin Penal. Nuk është e mundur të vazhdohet më kështu”.
Duket se ky qëndrim i ri i Ramës ka lidhje me episodin kur ndaj tij u zbraz një shiringë me bojë të zezë, me vezët dhe bojën e hedhur ndaj Erjon Veliajt apo kur një i ri i hodhi bojë deputetit të “opozitës së re”, Ralf Gjoni.
Nëse Rama do të shqetësohej shumë për dhunën ndaj funksionarëve, atëherë kishte mundësi ta bënte këtë edhe kur deputetë të listës së tij godisnin në mjediset e Kuvendit deputetë të opozitës.
Por duket se e gjithë kjo nismë e Edi Ramës për të marrë në mbrojtje funksionarët nga boja apo veza, i ngjason dekretit të Ramiz Alisë më 23 janar 1991.
Në atë kohë, Alia në cilësinë e Presidentit nxori një dekret për mbrojtjen e busteve që i cilësonte monumente kulture. Qëllimi në atë kohë ishte të mbrohej busti i Enver Hoxhës, ndërsa dënimet varionin nga 6 muaj në 3 vjet.
Dekreti i Alisë përcaktonte se bustet mbroheshin nga shteti.
Por më pak se 1 muaj nga ky dekret, më 20 shkurt 1991 u rrëzua busti i Enver Hoxhës që ndodhej në sheshin Skënderbej.
Sot Edi Rama paralajmëroi mbrojtjen e “busteve” të lëvizshme, ku përfshihen ministrat dhe deputetët, një pjesë të emëruar prej tij, dhe një pjesë të bindur ndaj tij.
