Opozita do të zhvillojë protestën e 7 para Kuvendit të Shqipërisë, ndërsa disa qindra forca policore kanë vendosur një perimetër të gjerë sigurie rreth zonës së Parlamentit.
Kështu e gjithë pedonalja, prej orëve të para të mëngjesit, është e pakalueshme për qytetarët., ndërsa janë vendosur kangjella dhe trupa policore.
Po kështu rruga pranë ish-selisë së vjetër të PD-së, është e pakalueshme për qytetarët pasi janë vendosur edhe këtu kangjella dhe policë.
Në rrugën e Elbasanit janë përqëndruar forca policore që nuk lejojnë kalimin në trotuarin në anën e Kuvendit.
Protesta e opozitës pritet të nisë në orën 09:30, ndërsa seanca parlamentare në orën 10:00.
Opozita i ka drejtuar një thirrje të gjithë qytetarëve t’i bashkohen protestës së saj, ndërsa kërkesat do të jenë të njëjta largim të kryeministrit Edi Rama, një qeveri tranzitore dhe zgjedhje të parakohshme.
Në protestën e fundit të opozitës, policia nuk përdori gazin apo ujin me presion kundër protestuesve, sikundër ka ndodhur më parë.
Nuk dihet nëse këtë rradhë policia, nën urdhërat e Lleshit, do të arrijë të ruajë qetësinë, apo do të sulmojë me gaz qytetarët.
