Ervin Saliani, ish-deputet i PD-së, dhe Lorenc Vangjeli, analist, janë përplasur mbrëmjen e djeshme në studion e Opinion, ku janë diskutuar përgjimet e reja të asaj që njihet si çështja “Babalja”.
Salianji ka paraqitur disa përgjime të reja, përmes të cilave provohen bisedat që kanë pasur drejtues të policisë me dëshmitarin e rreme, Fredi Alizoti, që mori përsipër të ketë luajtur rolin e Geron Xhafës në video-përgjimin mes tij dhe “Babales”.
“Unë jam shoku i Aldo Bares, i tmerron ata. Ka një zarf aty. i kërcënon persona të ndryshëm. Jam shoku i filanit, kam 18 vite në burg sa kam dalë. Kjo është vendosja e shtetit në shërbim të kriminelëve”, tha Salianji në lidhje me Fredi Alizotin, që sipas tij vendos gjoba ndaj biznese ndërsa policia e merr në mbrojtje duke i dhënë dhe lekë.
Në debatin në studio, analisti Vangjeli e pyeti Salianjin nëse kishte një vëlla që kishte ndryshuar emrin dhe që kishte probleme me drejtësinë.
Por ish-deputeti e ka mohuar një fakt të tillë, duke sqaruar se në rrethin e tij familjar nuk kishte asnjë person që të kishte probleme me drejtësinë.
“Unë kam një vëlla, që është student, por që s’ka pasur kurrë probleme, as ka ndryshuar emrin, por ti a je hajdut xhepash”, iu drejtua Salianji, Vangjelit.
Përplasjet mes Salianjit dhe Vangjelit kanë vijuar, për shkak se analisti është përpjekur të marrë në mbrojtje drejtuesit e policisë të kapur në përgjim nga prokuroria duke biseduar me Alizotin.
Sipas llogjikës së Vangjelit, drejtuesit e policisë e kanë ditur përgjimin e prokurorisë, por kanë pasur si detyrë për të vijuar lojën në funksion të hetimit.
Por kjo llogjikë e Vangjelit nuk është pranuar as nga drejtuesi i emisionit Blendi Fevziu, sipas të cilit asgjë nuk e përligj faktin që një drejtues policie të ketë dhjetra komunikime telefonike me një person, aq më tepër kur çështja ishte te Krimet e Rënda.
