Shoferë, kujdes! Lali Eri po ju “vjedh xhepat”, dyfishon gjobat

Nga Boldnews.al

Erion Veliaj nuk ndalon së abuzuari me xhepat e qytetarë të Tiranës. Pasi ka shtuar e shumëfishuar taksat për banorët e kryeqytetit, tashmë ka vendosur që të dyfishojë, në mënyrë tërësisht abuzive, gjobat për parkimin e automjeteve.

Në redaksinë e “Boldnews.al” mbërriti foto e një gjobe të vendosur paraditen e së Martës, në zonën e rrugës “Myslym Shyri”. Vartësi i Lali Erit, polici bashkiak Valand Hoxha, ka gjobitur një automjet me 2 mijë lekë të reja, për shkak se ka përfunduar afatin e kohës së qëndrimit tek parkimet me pagesë, të administruara nga Bashkia e Tiranës.

Deri më sot, gjoba për këtë shkelje ka qenë 1 mijë lekë të reja. Por, Lali, pasi arriti të merrte konfirmimin për të kandiduar për një mandat të dytë në krye të Bashkisë së Tiranës, ka nisur ta konsiderojë veten të paprekshëm, duke shtuar gjobat abuzive për qytetarët.

Rreth 3 vjet më parë, Erion Veliaj krijoi “Tirana Parking”, një kompani publike që siguron miliona euro të ardhura në vit nga pagesat e qytetarëve. Nëpërmjet këtij projekti, Bashkia e Tiranës tarifoi pjesën më të madhe të rrugëve të qytetit, duke e shndërruar parkimin në një proces thuajse të pamundur për mijëra makina që qarkullojnë në ditë në kryeqytet.

“Tirana Parking” rezulton një prej kompanive më fitimprurëse të Bashkisë së Tiranës, së bashku me Ujësjellës-Kanalizime, të dyja struktura që janë akuzuar shpesh publikisht për abuzimet me çmimet dhe me masat administrative.

LEXO EDHE  Protesta e opozitës, paralajmëron ambasada amerikane: Një demonstrim i madh pritet ...

Por, pavarësisht shkeljeve ligjore, “Lali Eri” ndihet i plot-fuqishëm, për sa kohë institucionet ligjzbatuese, përfshirë Policinë e Prokurorinë, nuk guxojnë të nisin një hetim penal ndaj tij dhe vartësve të tij, të cilët nuk ndalen së abuzuari me të drejtat e kryeqytetasve.

Thuajse çdo ditë, në media, përfshirë edhe në “Boldneës.al” mbërrijnë denoncime për abuzimet e Policisë Bashkiake. Pamje dhe foto të rasteve të abuzimit janë tashmë “rutinore”, kryesisht në portale informative, pasi mediat tradicionale janë të gjitha nën pushtetin e tij.

E, megjithatë, asnjë prej “ushtarëve” të Lali Erit, të veshur me uniformën e Policisë Bashkiake, nuk është marrë asnjëherë nën përgjegjësi disiplinore dhe, aq më pak, penale.

Të gjendur nën sigurinë e ofruar nga Erion Veliaj dhe ‘Rilindja” e tij, policët bashkiakë tashmë kanë nisur një ofensivë të re kundër xhepave të shoferëve. “Lali Eri” e ka paraqitur si projekt të mandatit të tij “pakësimin e qarkullimit të automjeteve, për të ulur ndotjen mjedisore”.

Por, në fakt, siç është e kuptueshme nga pjesa më e madhe e qytetarëve të Tiranës, fjalët e bukura propagandistike fshehin një realitet tjetër-atë të abuzimit me paratë e qytetarëve.

Sa për ndotjen mjedisore, Tirana vijon të jetë qyteti me cilësinë më të keqe në Europë. Dhe kjo, për shkak të qindra lejeve të ndërtimit, të cilat ‘Lali Eri” i ka me merak të madh që t’i japë, sidomos në qendër të kryeqytetit.