Gjykata për Krimet e Rënda dha sot vendimet për atë që njihet si banda e grabitësve të makinave të blinduara që shërbejnë për transportin e parave.
Lidhur me grabitjet, u akuzuan 8 persona, njëri prej të cilëve i shpallur në kërkim.
Ata akuzohen për grabitjet e kryera te një banke të nivelit të dytë pranë stacionit të Trenit dhe dy të tjerat në rrugën e Rinasit në vitin 2015.
Sipas prokurorisë, i pandehuri kryesor i grabitjeve është Admir Murataj, i cilësuar si organizator i bandës. Për të pandehurin Murataj, për shkak se ai është në gjykim në mungesë, është vendosur pezullimi i gjykimit dhe i takon një faze të mëvonshme gjykimi i tij sipas rregullave proceduriale të reja mbi gjykimin në mungesë, raporton shqiptarja.com.
Në vendimin e Gjykatës, dënimi më i lartë iu dha Dash Kupës me 18 vjet burg, për të vijuar me Ernest Kupa dhe Neim Avdylaj me nga 17.4 vite burg, Fatjon Xhyliu 14 vjet burg, Dritan Sinani me 13.4 vite burg, Aleksander Murataj me 12.8 vite burg, Ditjon memlikaj 8.6 vite burg dhe Admir Çerpja 5.8 vite burg.
Të pandehurit akuzohen se më datë 12.02.2015 kur ishte vjedhur dega e Bankes … ku sasia e parave të vjedhura ishte në masën 900 000 Franga Zvicerane, 800 000 Paund Britanik dhe 16.100 Euro, e paketuar në katër qese, vjedhje e ndodhur në zonën e Stacionit të Trenit Tiranë nga persona të armatosur;
Më datë 03.12.2015 kur ishte vjedhja Banka …. sasia e parave prej 1 800 000 Paund Britanik, 800 000 Dollarë Amerikanë, 200 000 Dollarë Kanadezë dhe 200 000 Dollarë Australianë, vjedhje e ndodhur në kohën kur paratë transportoheshin me mjete të blinduara në drejtim të Rinasit, poshtë Qafë Kasharit, Tiranë nga persona të armatosur.
Më datë 09.02.2017 kur ishte vjedhur Banka … ku sasia e parave të vjedhura ishte në masën 2 400 000 (dy milion e katërqind mijë) Euro, 200 000 Dollarë Amerikanë, 260 000 Paund Britanik, 85 000 Franga Zviceranë, 30 000 Dollarë Australianë dhe 30 000 Dollarë Kanadezë, e paketuar në tetë thasë, vjedhje e ndodhur kur paratë po transportoheshin gjatë rrugës për në Rinas në vendin pranë fshatit Domje, Tiranë nga persona të armatosur.
