Tre persona janë vënë në pranga, ndërsa një i katërt është shpallur lidhur me vrasjen e Ferdinant Polias, pasditen e 20 marsit në Grudë të Shkodrës.
Tre të rinj të moshës nga 20 deri në 26 vjeç, janë arrestuar në paraditen e sotme në kuadër të operacionit “Step By Step”. Aksion i Policisë së Shkodrës, në bashkëpunim me forcat Operacionale të Policisë së Shtetit dhe Prokurorinë e Rrethit Gjyqësor Shkodër.
Të arrestuarit
- Gilbert Toma, 26 vjeç, banues në lagjen “Skënderbeg”, Bashkia Shkodër.
- Kleandro Toma, 29 vjeç, lindur dhe banues në lagjen “Skënderbeg”, Shkodër.
- Alfred Martini, 20 vjeç, banues në fshatin Bardhaj, Shkodër.
Në kërkim u shpall K. S., 27 vjeç.
Aksioni
“Pas hetimeve intensive të kryera nën drejtimin e Prokurorisë Shkodër, rezulton se shtetasit e lartpërmendur dyshohen se drejtpërdrejt me veprimet e kryera kanë mbështetur me logjistikë dhe armatim, ndjekur, strehuar, organizuar dhe kryer në bashkëpunim këtë vrasje. Pas një pune intensive, ndjekjeje me metodat speciale të hetimit, u bë sigurimi i provave materiale dhe shkencore të cilat çuan në dokumentimin ligjor të kësaj ngjarje”, njoftuan burime zyrtare nga Policia e Shkodrës.
“Gjatë veprimeve hetimore u bë e mundur sekuestrimi i automjetit i cili është përdorur nga autorët për ndjekjen e viktimës, orientimin e ekzekutorit, kryerjen e vrasjes, djegien e motorrit dhe largimin bashkë me ekzekutorin.
Gjatë këtij operacioni janë sekuestruar 7 telefona, 17 fishekë të kalibrave të ndryshëm, targa të ndryshme automjetesh shqiptare dhe të huaja dhe dokumenta të ndryshme.
Vijon puna për zbardhjen e plotë të ngjarjes si dhe mbi motivin e kësaj ngjarje dhe identifikimin e personave të tjerë të përfshirë.
Materialet i kaluan Prokurorisë Pranë Gjykatës së Shkallës së Parë Shkodër, për veprën penale ‘Vrasje me paramendim e kryer në bashkëpunim’ dhe ‘Prodhimit dhe mbajtes pa leje të armëve dhe municioneve luftarake’, parashikuar nga nenet 78-25 e 278 të Kodit Penal”, shtuan të njëjtat burime. /BN/
