Rebani Jaupi është emëruar drejtor i Policisë së Tiranës, duke zëvendësuar në këtë mënyrë Kastriot Skënderajn.
Jaupi fitoi gradën drejtues i lartë gjatë kohës që ministër i Brendshëm ishte Saimir Tahiri. Me origjinë nga Tepelena, Jaupi ka mbajtur funksione të larta drejtuese në Policinë e Shtetit.
Madje, ai zëvendësoi në detyrë si i komanduar edhe Haki Çakon, pas pezullimit që iu bë nga funksioni i Drejtorit të Përgjithshëm i Policisë së Shtetit.
Vite më parë, Jaupi ka qenë zv.drejtor i Policisë së Tiranës, si dhe drejtues policie në qarqet Durrës dhe Elbasan.
Ai ka drejtuar edhe krimin ekonomik në Drejtorinë e Përgjithshme të Policisë së Shtetit, si dhe ka mbajtur pozicionin e zv. Drejtorit të Policisë së Shtetit.
Ish-Kryeministri Sali Berisha, gjatë kohës kur Jaupi u emërua në krye të Policisë së Shtetit, e cilësoi atë si ushtar të krimit dhe me lidhje të forta me Agron Xhafajn, vëllain e ish-ministrit të Brendshëm, Fatmir Xhafaj.
Ndërkohë që, Presidenti Ilir Meta, rreth 1 vit më parë e cilësonte Jaupajn si një funksionar me integritet të lartë.
