Një vajzë 4-vjeçare ndodhet nën mbikëqyrjen e mjekëve pasi ra nga kati i 7-të i një shumëkatëshi në qytetin Gothenburg të Suedisë.
Plagët e vogëlushes fillimisht u konsideruan të rënda, por zëdhënësja e Spitalit Sahlgrenska tha për “P4 Goteborg” se 4-vjeçarja, identiteti i saktë i së cilës nuk bëhet i ditur, rezultoi vetëm me plagë të lehta.
“Për shkaqe ende të panjohura, vajza ra nga kati i 7-të dhe u ndalua në çatinë metalike në nivelin e katit të dytë”, tha zëdhënësi i policisë, Hans Lippens, për “TT”.
Prindërit e vajzës u morën në pyetje nga policia dhe u liruan pasdreken e së dielës, por vijojnë të mbeten nën hetim. Në pyetje u morën edhe fqinjët e vajzës, por asgjë deri më tani nuk ka ndihmuar në zbardhjen e ngjarjes që mund t’i kishte kushtuar jetën vogëlushes.
Policia konfirmoi që shumë elementë tregojnë për neglizhencë dhe mbi këtë bazë kanë nisur edhe hetimet e para.
