Nga Boldnews.al
Autoritetet shqiptare, në një tentativë për të siguruar kapitale të huaja, kanë ulur ndjeshëm vigjilencën mbi shtetasit e huaj që afrohen për biznes në Shqipëri.
Në një rast të fundit, një seri institucionesh kanë dëshuar, ndoshta edhe kanë toleruar, verifikimin e kërkesës së dy shtetasve indianë për të marrë shtetësinë shqiptare.
Të angazhuar në zbulimin e “lidhjeve kriminale” të gjyqtarëve e prokurorëve në kuadër të Vetingut, si edhe të investuar politikisht për të “zbuluar” lidhjeve të opozitës me “interesa ruse”, institucionet e sigurisë, si Shërbimi Informativ Shtetëror e Drejtoria e Sigurimit të Informacionit të Klasifikuar po dështojnë në seri për të përmbushur detyrimet e tyre ligjore.
Biznesmenët nga Nju Delhi, të kërkuar në vendin e tyre për mashtrime në shuma gjigande, Nitin Jayantilal Sandesara dhe Chetankumar Jayantilal Sandesara janë pajisur me pasaportë shqiptare nga Presidenti i Republikës, pas verifikimeve të kryera nga institucionet e sigurisë.
Dy shtetasit indianë akuzohen nga autoritetet e vendit të tyre se kanë përvetësuar rreth 725 milionë dollarë, nëpërmjet manovrave financiare. Pas problemeve në vendin e tyre, Nitin dhe Chettankumar Sandesara kanë gjetur rrugën për të mbërritur në vendin tonë e për t’u bërë zyrtarisht shtetas shqiptarë.
Në bazë të të dhënave zyrtare, Ministri i Turizmit, Blendi Klosi, i ka dërguar Presidentit të Republikës kërkesën për të pajisur me shtetësi shqiptare dy indiandët. Ata janë prezantuar në Shqipëri si biznesmenë që do të investonin në turizëm.
Presidenti Meta, në përmbushje të detyrimeve ligjore, pasi ka marrë këtë kërkesë, ua ka dërgon institucioneve të sigurisë kombëtare.
Në një njoftim zyrtar të Presidencës, rezulton se Shërbimi Informativ Shtetëror (SHISH), Drejtoria e Sigurimit të Informacionit të Klasifikuar (DSIK) dhe Interpol Tirana, kanë dorëzuar pranë kreut të shtetit “kartelë të pastër” për dy biznesmenët indianë.
Pas këtyre informacioneve zyrtare, Presidenca pajisi me pasaportë shqiptare dy Sandesara-sët, duke u krijuar në këtë mënyrë mundësinë që ata të udhëtojnë lirshëm edhe në vendet e zonës Shengen.
Ky është aspekti formal i çështjes. Por çfarë duhet të ketë ndodhur në këtë rast skandaloz?
Qeveria shqiptare gjendet nën kritika të forta për mungesën e investimeve të huaja. Prej vitesh, asnjë kompani serioze nuk është afruar në vendin tonë për sjellë kapitale në Shqipëri. E, për këtë arsye, autoritetet shqiptare mirëpresin këdo që prezantohet si investues, pavarësisht të shkuarës së dyshimtë.
Kjo tolerancë e tepruar ka forcuar dyshimet se Shqipëria është shndërruar “de facto” në një vend parajse fiskale për pastrim parash nga persona të ndryshëm, shqiptarë e të huaj.
Departamenti Amerikan i Shtetit, në raportin e tij më të fundit për Shqipërinë, shkruan: “Mënyrat më e mirë për të fshehur të ardhurat e paligjshme janë aktivitetet e shit-blerjes së pronave të paluajtshme, në veçanti në bregun e detit, projektet e zhvillimit (ndërtimi) dhe lojrat e fatit. Forcat e rendit e pranojnë se duhet të luftohet aktiviteti i pastrimit të parave por deri më ato janë të paefektshme në luftimin e këtij fenomeni”.
