Sabjen Lilaj e Skënderbeu mbyllën me marrëveshje shlyerjen e pagave dhe shpërblimeve të pamarra dhe tani palët duket se janë sërish më afër se kurrë.
Në kushtet kur Skënderbeu kërkon të formojë sërish një ekip pretendent për titull sezonin e ardhshëm, përgatitjet për një gjë të tillë drejtuesit e klubit kanë filluar t’i bëjnë që tani. Dhe emri i parë në radhë në listën e dëshirave të klubit është pikërisht ai i Sabjen Lilajt.
Mesfushori korçar, që u largua nga Skënderbeu në verën e vitit 2018 për të shijuar aventurën në Azerbajxhan në radhët e Gabalës, duket se do të kthehet sërish në Korçë. Kontrata e tij me klubin azer është njëvjeçare dhe përfundon në qershor të këtij viti. Në të tilla kushte, duke parë edhe mungesën e minutave të shumta në ndeshjet e fundit, për faktin se ka humbur pozicionin e titullarit, gjithçka mund të rikthejë atë lidhje të fortë mes Lilajt dhe Skënderbeut.
Burime të sigurta nga klubi bëjnë me dije se ka pasur biseda mes drejtuesve të Skënderbeut dhe lojtarit në fjalë, duke folur për të ardhmen. Drejtuesit e klubit janë gati që sezonin e ardhshëm të kthejnë në ekip futbollistin për ta nisur pikërisht nga ai riformimin e ekipit për edicionin e ri. Nga ana tjetër, Lilaj, i nisur si titullar këtë sezon me Gabalën, duket se ndjeshëm e ka humbur këtë pozicion dhe është në dilemë për të rinovuar me klubin azer nëse do t’i ofrohet kjo mundësi apo për t’u rikthyer në Korçë. Gjë që do të duket në fund të këtij sezoni.
BISEDIMET – Nga sa raportohet për gazetën, bisedime ka pasur disa ditë më parë, kur klubi i ka bërë të qartë Sabjen Lilajt idenë për fuqizimin e ekipit sezonin e ardhshëm me shpresën se në KAS gjithçka do të mbyllet në favorin e korçarëve.
Nga ana tjetër, Lilaj ka kërkuar garanci nga Skënderbeu, që nëse arrihet një marrëveshje për rikthimin e tij, të njohë edhe përbërjen e ekipit apo nivelin e lojtarëve që do të bashkohen me Skënderbeun. Në të tilla kushte, klubi i ka bërë me dije lojtarit se nga ekipi aktual do të largohen një pjesë e mirë e futbollistëve dhe do të qëndrojnë vetëm ata që kanë bindur dhe kanë dhënë garanci.
Ndërsa nga ana tjetër, merkatoja po sipas të njëjtave burime, pritet që të jetë cilësore ku do të afrohen lojtarë që të garantojnë nivel të lartë për ekipin bardhekuq. Tashmë pritet të shihet se deri në çfarë pike janë kontaktet e para mes palëve. Për sa i përket Lilajt, lojtari me shumë mundësi sikundër ka bërë edhe me dije do të presë nëse do të vijë një ofertë rinovimi për të nga ekipi i Gabalës apo jo. Nëse një gjë e tillë nuk vjen, Lilaj i thotë lamtumirë aventurës azere dhe është gati për t’u kthyer në qytetin e lindjes./Panorama/