Zëdhënësi i Presidentit të Republikës përmes një deklarate ka sqaruar procedurën për dhënien e shtetësisë shqiptare, shtetasve të huaj, Nitin Jayantilal Sandesara dhe Chetankumar Jayantilal Sandesara, të cilët akuzohen nga autoritetet indiane për vjedhjen dhe pastrimin e 725 milionë dollarëve.
“Janë zbatuar procedurat ligjore bazuar në pikën 7, të nenit 9 të ligjit nr. 8389, datë 05.08.1998 “Për shtetësinë shqiptare” të ndryshuar, me propozimin e Ministrisë së Turizimit dhe Mjedisit, “për shkak të eksperiencës në investime dhe historikut të sipërmarrjeve të suksesshme jashtë Republikës së Shqipërisë dhe për shkak të angazhimit të tyre për realizimin e investimeve të rëndësishme elitare në vendin tonë”, thuhet në deklaratën e Presidencës.
Në vijim sqarohet se bazuar në pikën 6, të nenit 9 të ligjit për shtetësinë, janë bërë verifikimet përkatëse nga agjencia ligjzbatuese nga e cila nuk kanë rezultuar të dhëna problematike për dhënien e shtetësisë shqiptare.
Nitin Jayantilal Sandesara dhe Chetankumar Jayantilal Sandesara kanë hapur biznese në Shqipëri, ndërsa thuhet se po ndërtojnë edhe në jug të vendit tonë.
Vëllezërit Sandesara kanë qenë pronarët e kompanisë farmaceutike Sterling Biotech, ku sipas informacioneve, përgjatë viteve 2008-2011 ata kanë marrë mbi 725 milionë dollarë kredi nga disa banka shtetërore të Indisë, para të cilat janë zhdukur përmes një rrjeti prej 300 kompanish offshore të ngritura nga vetë ata.
Ndërkohë Nitin Sandesara rezulton të jetë dhe konsull nderi i Shqipërisë në Nigeri me zyrën e konsullatës së nderit në Abuja.
Interpol Tirana në bashkëpunim me shërbimet e Policisë Rinas arrestoi paraditen e kësaj të premteje një shtetas indian, i cili ishte shpallur në kërkim ndërkombëtarë për pastrim parash, që rezulton se është kunati i dy vëllezërve të sipërpërmendur.
