Shkëlzen Berisha, djali i ish-kryeministrit Sali Berisha, në një intervistë në ‘Të Paeskpozuarit’, ka hedhur sërish poshtë të gjitha akuzat ndaj tij, në lidhje me ngjarjen e Gërdecit.
Berisha u shpreh se gazetari amerikan Guy Lawson, i ka lidhur qëllimisht dy historitë, atë të Gërdecit dhe atë të AEY të shitjes së armëve, me qëllim që ta bënte ngjarjen sa më interesante.
Berisha ka sqaruar gjithashtu se të dy historitë nuk kanë asnjë lidhje me njëra-tjetrën, dhe se ai s’ka asnjë lidhje me ngjarjen, duke shtuar se gazetari amerikan në asnjë moment nuk e ka pyetur për këtë histori.
‘Zoti Guy Lawson në ndryshim nga një pjesë e mirë e medias në Shqipëri, e di shumë mirë që historia e gërdecit nuk ka asnjë lidhje me AEY. Ai përpiqet që ti lidhë këto dy histori për ti bërë sa më të rëndësishme dhe të besueshme. Gërdeci dhe AYE janë dy histori të ndryshme nga njëra-tjetra’, deklaroi Berisha.
