Nga Boldnews.al
Ndërsa në Tiranë mijëra protestues të thirrur nga opozita kanë rrethuar kryeministrinë, kreu i qeverisë gjendet në Berat prej dy ditësh, që më shumë se t’i shmanget protestës po bën lëvizje taktike për të mbajtur me çdo kusht pushtetin.
Sa ngjashmëri me taktikën e Hoxhës, kur në tetorin e vitit 1944 ishte në zgrip të përjashtimit nga partia, por mundi të bëhej kryeministër dhe më pas mbajti nën diktaturë vendin deri kur vdiq në mënyrë natyrale.
Ishte ora 10:00 e datës 23 nëntor 1944. Në Beratin e porsaçliruar po fillonte punimet njëra nga mbledhjet më të veçanta të periudhës së Luftës Nacionalçlirimtare. Qe ajo mbledhje, që do të hynte fuqishëm në historinë 50-vjeçare të Shqipërisë komuniste, duke u njohur si “Plenumi i Beratit” dhe me programin e veprimtarisë së Partisë Komuniste. Me ndihmën e jugusllavëve, (ndërkombëtarëve të kohës), Hoxha u mbrojt në këtë plenum dhe arriti të marrë postin e lartë të kryeministrit të shqipërisë.
Po Rama sot ka zgjedhur Beratin në mënyrë domethënëse, me të përngjashmin në genin politik Enver Hoxha. Nga ai plenum Hoxha u bë edhe më i fortë, ndonëse ishte në prag të largimit, apo siç e konsideronte partia, eliminimit politik ose edhe fizik.
Rama ka ngjashmëri me Hoxhën, sidomos në lëvizjet taktike. Ai prej dy ditësh gjendet në Berat fillimisht duke injoruar protestën dhe mbledhur në takime mijëra mbështetës që kryesisht vijnë si pjesë e administratës shtetërore.
Ndërsa para Parlamentit lëshohet në masivitet gaz lotsjellës mbi protestuesit, Rama ia plas gazit duke postuar një video me këngë polifonike, mes disa fëmijëve, sikurse asgjë nuk po ndodh në vendin që drejton. Edi Rama shpreson që protesta të venitet dhe ai të futet si “triumfator” në Tiranë, jo me meritën e tij, por nga përdorimi i gazit lotsjellës, terrorit pas protestës me dhjetëra dhe qindra të arrestuar.
Rama aktualisht është me parimin shtatë hile dhe një trimëri, që edhe këtë të fundit duket se e ka vetëm nga mbështetja e deritanishme e një pjesë të ndërkombëtarëve, që për momentin po luajnë rolin e “Emisarëve Jugosllav” në vitit 1943-1944, për të mbajtur në pushtet Enver Hoxhën.
Edhe Miladin Popoviç dhe Stefan Mugosha quheshin “ndërkombëtarë” në atë kohë… Deri tani disa syresh Eurodeputetë, kanë mbështetur kryeministrin Rama fuqishëm, duke e konsideruar legjitime qeverinë e tij dhe sipas tyre të dala nga zgjedhje të njohura të vitit 2017.
Rama nuk kthehet në Tiranë pa u pastruar vendi nga çdo protestues, ndërsa vetë rri larg, edhe në rast të incidenteve të rënda do të justifikohet: “Unë nuk isha aty, atë e bënë të tjerët”! Sa për “Emisarët ndërkombëtarë”, ata janë futur në zyrat e tyre komode dhe po bajnë gati deklaratën e radhës faji është i protestuesve opozitarë…
