Presidenti i Parlamentit Evropian, Antonio Tajani ka habitur jo pak me deklaratat që ka bërë në favor të Benito Mussolini-t.
“Deri kur nuk ka ndjekur Hitlerin, ka bërë gjëra të mira për vendin tonë. Deri kur nuk deklaroi luftë gjithë botës duke ndjekur Hitlerin dhe ligjeve raciale, ka bërë gjëra pozitive për vendin tonë, ka realizuar infrastrukturë, ka bonifikuar territorin. Duke parë gjërat konkrete të realizuara, nuk mund të thuash që nuk ka bërë gjë”, ka deklaruar Tajani në emisionin radiofonik “La zanzara”.
Duke theksuar se nuk e përkrah ideologjinë fashiste dhe është kundër saj, Tajani shtoi se “mund të mos jesh dakord me mënyrat e tij, unë nuk jam fashist dhe nuk vlerësoj mendimin e tij politik. Por nuk mund të mohohet që ka ndërtuar stadiume, ura, rrugë, ka rimëkëmbur industrinë. Kur një person jep një gjykim historik duhet të jetë objektiv. Pastaj normalisht që ligjet raciale kanë qenë çmenduri, dhe lufta një vetëvrasje.”
Zyrtarë të shumtë të institucioneve evropiane kanë reaguar ashpër kundër deklaratave të Antonio Tajanit.
