Gjykata për Krime të Rënda shpalli fajtor Fatjon Karmeshtnën për vrasjen e Suela Sulës, ngjarje e ndodhur rreth 3 vite më parë në Shkodër.
Fillimisht, për këtë ngjarje u arrestua dhe gjykua bashkëshorti i viktimës, Sadetin Sula, i dënuar tashmë nga Shkalla e Parë, po me burgim të përjetshëm, ndërsa gjatë hetimeve u zbulua se në vrasjen e Suelës, kishte marrë pjesë edhe një tjetër, kjo pasi materiali biologjik i gjendur në thonjtë e viktimës nuk ishte i Sadetin Sulës, por i një tjetër personi, që rezultoi Fatjon Karmeshtna.
Referuar akuzës, ngjarja e rëndë kishte motiv dyshimet për tradhti bashkëshortore, ndërsa Karmeshtna, në rolin e ekzekutuesit, është shtyrë nga përfitimet materiale që do të merrte.
Gjatë një hetimi, i cili është shtrirë në një kohë prej 2 vitesh, janë zbardhur dëshmi të rënda të fëmijëve të çiftit, audio-përgjime të rastësishme, letra ku Suela Sula shkruante për periudhën e keqe që po kalonte, duke pasur shpresë se një ditë çdo gjë do të zgjidhej. Ndërkohë, ashtu si Sadetin Sula, i dënuar në Shkallë të Parë, duke u gjetur fajtor nga Gjykata për vrasjen e bashkëshortes së tij, edhe Fatjon Karmeshtna, e ka mohuar autorësinë. Karmeshtna ka thënë se ditën e ngjarjes nuk ka qenë në punë, por fillimisht në shtëpinë e tij me bashkëshorten dhe fëmijët, më pas ka dalë për të zgjidhur një punë të tijën.
Por për Prokurorinë, këto pretendime mbeten në nivelin e deklaratave dhe nuk mbështeten në asnjë provë tjetër. Ka qenë motra e viktimës, e cila ka dyshuar fillimisht te kunati i saj, ndërsa më pas nga hetimet rezultoi se Sadetin Sula, për shkak të dyshimeve dhe mosmarrëveshjeve, i kishte kërkuar Karmeshtnës të hiqte qafe Suelën. Një nga provat më të forta të Prokurorisë janë edhe audiot, ku dëgjohen biseda të Sadetin Sulës dhe Fatjon Karmeshtnës.
Ato janë gjetur nga vajza e viktimës pasi është marrë telefoni nga Prokuroria. Pasi janë konstatuar këto audio, janë dorëzuar në Gjykatë, ndërsa gjatë bisedave dëgjohet që dy bashkëbiseduesit janë shumë të afërt, pasi diskutojnë edhe problemet e familjes së Sadetinit.
Në një nga bisedat dëgjohet të thuhet nga ky i fundit se më mirë e mbyste se sa të ndahej. Nga ana tjetër, dëgjohet një bisedë, ku Karmeshtna i thotë se nëse nuk bënë punë magjia edhe këtë herë, ai do të kryente punën ndryshe punën.
Ndërkohë, gjatë shqyrtimit gjyqësor të dosjes, në Gjykatë kanë dhënë dëshminë e tyre edhe fëmijët e viktimës, të cilët kanë pohuar se prindërit e tyre nuk kishin një marrëdhënie të mirë dhe se i ati shpesh e ka dhunuar fizikisht dhe psikologjikisht nënën e tyre.
“Babai shpesh e akuzonte mamanë për marrina, gjëra që ajo nuk i bënte kurrë. Fationi ndikonte të babai duke i thënë se mami kishte marrëdhënie me persona të tjerë”, ka thënë vajza e çiftit. Ndërkohë, në dëshmi, më tej fëmijët kanë treguar edhe për një rast, kur sipas tyre, Sadetin Sula e kishte lënë jashtë në shi viktimën dhe ka mbyllur derën e banesës që të mos futej. /Burimi:Panorama.
