Kreu demokrat Lulzim Basha do të zhvillojë takime intensive me qytetarët e Tiranës, tur që nisi të shtunën në Paskuqan, në funksion të protestës së 16 marsit.
Një ditë më parë, kreu demokrat zhvilloi një mbledhje me ish-deputetët, anëtarët e kryesisë si dhe drejtuesit e degëve të PD-së në rrethe, ku ka kërkuar angazhim maksimal prej tyre në takimet me qytetarët.
Partia më e madhe e opozitës ka paralajmëruar takimet derë më derë me qytetarët, pavarësisht bindjeve të tyre, në funksion jo vetëm të ndërgjegjësimit për të protestuar ndaj qeverisë, por edhe për t’I shpjeguar pjesë të programit të demokratëve, për zgjidhjen e problemeve të qytetarëve, qofshin këto në aspektin e punësimit, taksave të biznesit, uljes së çmimit të energjisë apo ndihmës ekonomike.
Burime nga PD konfirmojnë se përgjatë 3 ditëve, kreu demokrat do të ketë takime intensive në qarkun e Tiranës, ndërsa më pas do të jetë në takimet në rrethe.
Burimet shprehen se paralelisht, grupet e punës të ngritura nga PD po kontaktojnë grupet e ndryshme të interest, ku një vëmendje e madhe po i kushtohet faktorit ndërkombëtar për të informuar këtë të fundit mbi atë që po ndodh në Tiranë dhe arsyet se dorëzimit të mandateve nga opozita. Veçanërisht vëmendja në raport me ndërkombëtarët është fokusuar në Bruksel, kryeqendrën europiane, ku ndodhen edhe institucionet kryesore të Bashkimit Europian.
Protesta e 16 marsit konsiderohet si një test i rëndësishëm, jo vetëm në aspektin e pjesëmarrjes së qytetarëve, por edhe në atë të mbajtjes së situatës nën kontroll, duke respektuar një kërkesë të vazhdueshme të ndërkombëtarëve për protesta apo demostrata paqësore.
