Frika nga një eksod i ri i shqiptarëve drejt Italisë për shkak të situatës ku ndodhet vendi ka bërë që drejtori i gazetës “Libero”, Pietro Senaldi, t’I kërkojë Kryeministrit Edi Rama gjetjen e një zgjidhjeje politike.
Senaldi ishte përballë Ramës në emisionin “Porta a Porta” të Bruno Vespas, ku gjithashtu përmes një interviste ishte i pranishëm edhe kreu i opozitës, Lulzim Basha.
Gazetari Italian solli në vëmendjen faktin se eksodi i parë masiv në Itali ishte ai i shqiptarëve dhe në këtë kuadër ai tha se duhej një ndërhyrje politike për të shmangur një tjetër eksod.
Por, kryeministri lidhur me emigrantët shqiptarë kishte një këndvështrim tjetër. Ai tha se janë shqiptarët që po ndihmojnë Italinë, pasi janë me mijëra emigrantë që punojnë atje dhe kanë krijuar sipërmarrje.
Debati
Senaldi: Përse po ndodh pikërisht tani? Nga Shqipëria ka ardhur vala e parë e emigrantëve, tani ne po investojmë në Shqipëri. Këtu themi, pasi emigracioni është një çështje delikate, t’i ndihmojmë në shtëpinë e tyre. Ky mund të jetë një shembull i mirë t’i ndihmojmë në shtëpinë e tyre si funksionarë.
Rama: Me shqiptarët jo, sepse jemi ne që po ju ndihmojmë në shtëpinë tuaj. Sepse jemi qindra mijëra që punojmë këtu dhe që kemi ngritur sipërmarrje. Në rastin e shqiptarëve jo. Ne jemi vërtetë një Itali e vogël, nga ana tjetër e detit.
Senaldi: Përse tani?
Rama: Sepse në qershor janë zgjedhjet. Ata bënë të njëjtën gjë edhe në zgjedhjet e mëparshme. Në sondazhe janë më keq se sa opozita juaj këtu. Nuk kanë asnjë shans për të fituar. Sikurse e thashë, jo vetëm ne. Por të gjithë shqiptarët por edhe italianët besoj nuk jemi humbës të mirë. Pra kërkojmë gjithnjë një alibi.
