Nga Boldnews.al
Të jetë rastësi? Nuk duket aspak, që në ditën e parë si “deputetë opozitarë”, katër përfaqësuesit e LSI-së Ylli Shehu, Edmond Rrushi, Aurora Mara dhe Enver Roshi zunë katër karriget “simbolike” ku uleshin “big-ët” e PD-së.
Në të njëjtën karrige ku ulej Flamur Noka, vendin ia ka zënë Ylli Shehu. Ajo që i lidh në këtë rast është vetëm krahina nga vijnë. Sa për opozitarizëm të fortë, Shehu e ka treguar se përveç fjalës “Betohem” (edhe ajo e detyruar në momentin që merret mandati), nuk ka bërë kurrë zë në asnjë fjalim.
Në karrigen ngjitur me të, ku më parë qëndronte zakonisht Jorida Tabaku, sot ishte zënë nga deputeti rishtas Edmond Rrushi. Të flasë për çështjet ekonomike tenderat korruptive të dyshuara të qeverisë apo PPP-të e famshme të Ramës, ashtu siç bënte Tabaku?
Bast i vështirë duket, ndonëse Rrushi e njeh mirë çështjen tender…, ka drejtuar për disa muaj QSUT-në në vitin 2013, me disa probleme serioze në gjetjet e KLSH-së, por për të është një histori e shkuar, për aq kohë sa “amnistoi” veten, duke iu bashkangjitur mazhorancës, por me kamulfash opozitari.
Më interesant ndër ta, është vendi i lënë bosh nga ish-kryeministri Sali Berisha. Ajo karrige është zëvendësuar “denjësisht” nga Aurora Mara. Një emër që edhe “google” nuk e ka në memorien e saj… Mendoni Marën të mbajë fjalime të forta si ato të ish-kryeministrit Berisha që nxirrnin nga binarët në çdo rast Edi Ramën. Sport i vështirë për të.
Kjo është pamja që sot prodhoi Parlamenti “pluralist” me opozitarë të futur nën aureolën e qeverisë. Pavarësisht situatës së rëndë që po kalon vendi me një opozitë që ka djegur mandatet e deputetëve në bllok që më 21 shkurt dhe me protestat e vazhdueshme para Parlamentit, kryeministri Edi Rama provokon edhe me dekorin në kuvend, duke “zëvendësuar” edhe me gjeste vendin ku uleshin më parë përfaqësuesit e PD-së.
Kjo gjetje e Ramës u ka rënë edhe në sy deputetëve socialist që u mbytën nga të qeshurat e zgjatura, ndërsa jashtë sallës së parlamentit qytetarët po protestojnë.
