Disa qindra mbështetës të opozitës janë nisur nga rrethe të ndryshme të vendit për t’iu bashkuar protestës që do të nisë rreth orës 10:00 para Kuvendit të Shqipërisë, në një kohë që ky i fundit është thirrur në seancë plenare.
Një grup protestuesish, kryesisht nga Tirana, do të jenë para Kuvendit rreth orës 09:15, pasi deputetët e PS pritet të hyjnë në mjediset parlamentare 30 minuta para nisjes së seancës.
Në mënyrë të organizuar, qytetarët janë nisur drejt Tiranës, ndërsa nga raportimet mësohet se është një numër relativisht i lartë.
Kryetari i PD-së Shkodër, Xhevdet Amulli, tha se kërkesat e opozitës së bashkuar janë të njohura tashmë; largimi i kryeministrit Rama dhe qeveri tranzitore, që do të garantojë zgjedhje të parakohshme
Kreu i PD-së në Fier, Luan Baçi, u shpreh se qytetarët nuk do të lejojnë që parlamenti të vijojë punën normalisht pasi nuk është një parlament normal. “Protestat do të vazhdojne sa herë që do të ketë parlament. Absolutisht që do të ketë zgjedhje të parakohshme sepse populli do të votojë për qeverinë që do në pushtet dhe jo qeverinë që vjedh vota”, tha Baçi.
Sot pritet që numri i protestuesve para Kuvendit të jetë shumë më i madh se ai i protestës së një jave më parë, ndërsa Garda e Republikës dhe Policia e Shtetit kanë marrë masa shtesë.
Garda ka montuar një shkallë e cila pritet të përdoret për hyrje- daljet e deputetëve nga kalaja e Tiranës, ndërsa një tjetër masë nga policia është dhe vendosja e telit me gjemba në hyrje të parlamentit, me qëllim parandalimin e protestuesve nëse do ketë thyerje të kordonit të policisë.
Në protestë pritet të angazhohen rreth 1200 punonjës policie të cilët do të krijojnë një kordon më të gjerë se gjatë protestave të tjerë, me qëllim ruajtjen e godinës së parlamentit, ndërsa një mundësi nga policia është dhe bllokimi i pedonales deri tek ministria e brendshme.
Ndërkohë që në mbrojtje të Parlamentit janë angazhuar edhe forcat e FNSH dhe ato të RENEA. Kryesisht këto të fundit do të jenë të pozicionuara ose në lartësitë e objekteve rrotull Kuvendit, ose në brendësi të oborrit të godinës, në gadishmëri për të ndërhyrë në precipitimin e situatës.
Gjatë fundjavës policia ka montuar dhe kamera sigurie me rezolucion të lartë, të cilat me anë të zmadhimit, do të dokumentojnë të gjithë aktivitetin e protestuesve, por do të bëjnë edhe identifikimin e tyre biometrik.
Nuk dihet nëse policia edhe sot do të përdorë gaz helmues ndaj protestuesve, pasi herën e fundit sasia e hedhur dëmtoi shumë prej banorëve të zonës që s’kishin lidhje me protestën.
Në seancën e sotme pritet që të mos jetë i pranishëm Kryeministri Edi Rama, i cili njoftohet se do të udhëtojë drejt Italisë.
