Ish-ministri i Drejtësisë, Ylli Manjani, ka reaguar ashpër në rrjet lidhur me provokatorët e policisë në protestat e opozitës.
Një ditë pas publikimit të një fotoje, ku shfaqej një provokator që kishte sulmuar derën e Kryeministrisë në protestën e 16 shkurtit, Manjani shkruan “turpi e faqja e zezë vetëm mbi qeverinë, që na shet nëpër botë ai mos ma keq!”.
Postimi i Manjanit
Pas fakteve që kanë dalë së fundmi në media, sipas të cilave policë të maskuar si protestues kanë qenë protagonist të sulmeve të dhunshme te kryeministria apo edhe te parlamenti, ka reaguar edhe ish-ministi i Drejtësisë, Ylli Manjani, nëpërmjet një shënimi të shkurtër në Facebook. Sipas Manjanit kur shohim se provokatorë të policisë nxisin dhunë, të gjithë ndihen keq. Kjo është e poshtër, e ndyrë sa më nuk ka-shkruan ai.
Por edhe më e ndyrë sipas ish-ministrit është ajo që bën qeveria, duke e shitur këtë “dhunë” nëpër botë si të orkestruar nga opozita.
Postimi i plotë i Ylli Manjanit
Për dhunën në protesta
Pa dyshim që skenat e përplasjes së protestuesve me forcat e sigurisë dhe tymi i gomës së djegur dhe i gazit lotsjellës, nuk janë një gjë e mirë. As e dëshiruar nga askush.
Nuk ka nevojë të jesh ambasador apo emigrant që të ndjehesh keq, sepse keq ndjehemi të gjithë.
Por ndjehemi shumë më keq kur shohim se si provokatorë të policisë nxitën një grup protestuesish për të sulmuar Kryeministrinë!!!
Kjo është e poshtër! E ndyrë sa më ska!
Masa e madhe e protestuesve nuk dalin atje, për të dhunuar askënd. Por fatkeqësisht largohen të dhunuar e të helmuar krejt pa faj, nga Policia politike e pushtetit!
Qartësisht dhunën e deshi vetëm qeveria moniste, jo protestuesit paqesorë. Këto të fundit nuk hodhën asnjë gurë e nuk plagosën asnjë polic.
Turpi e faqja e zezë vetëm mbi qeverinë, që na shet nëpër botë ai mos ma keq!
