Një tjetër kandidate, e përfshirë në listën shumë emërore të LSI-së, pritet të marrë mandatin e deputetit, duke shtuar në këtë mënyrë listën e atyre që nga njëra palë konsiderohen si tradhëtarë dhe nga pala tjetër si opozita e re.
Bëhet fjalë për Edjola Braha, e cila mban postin e kryetares së LSI-së për Tepelenën, por që siç duket do të hyjë në Kuvend, duke zëvendësuar Vangjel Tavon, në qarkun e Gjirokastrës.
Monika Kryemadhi një ditë më parë bëri një paralajmërim të qartë ndaj kandidatëve që do të marrin mandatet, duke u shprehur se veprimi i tyre nuk do të harrohet.
Por siç duket një pjesë e emrave të përzgjedhur nga LSI po mirëpresin ofertat e mundshme apo këshillat me “ndërkombëtarë” për të qenë pjesë e Parlamentit.
Nga LSI, deri më tani kanë pranuar marrjen e mandatit 4 kandidatë, ndërsa të paktën dy të tjerë janë të vendosur për ta marrë.
Aurora Mara ishte kandidate e LSI-së në Qarkun e Dibrës për zgjedhjet parlamentare të vitit 2017. Ajo ishte e dyta në listë pas ish-deputetit Përparim Spahiu, i cili ishte edhe udhëheqësi i Lëvizjes Socialiste për Integrim në Qarkun e Dibrës.
Në listën e kandidatëve të LSIsë për Qarkun e Tiranës ishin dy persona që plotësuan formularin e dekriminalizmit, duke i hapur rrugë marrjes së mandatit të deputetit. i pari ishte Ylli Shehi, i cili u zgjodh deputet për herë të parë në vitin 2013 nën siglën e Partisë Republikane të udhëhequr nga Fatmir Mediu.
Kandidati tjetër nga LSI në Qarkun e Tiranës ishte Edmond Rrushaj, i cili ishte i pozicionuar i nënti në listën e kandidatëve të Lëvizjes Socialiste për Integrim për zgjedhjet parlamentare të vitit 2017.
Edmond Rrushaj ka mbajtur më përpara detyrën e drejtorit të QSUT-së.
Enver Roshi, kandidati tjetër, i cili do të marrë detyrën e deputetit nga radhët e LSI-së, ka mbajtur më parë detyrën e drejtorit të Institutit të Shëndetit Publik si edhe të dekanit në Fakultetin e Mjekësisë.
