Nga Boldnews.al
Kryetari i Parlamentit Europian, Antonio Tajani e cilësoi situatën në Shqipëri shumë të vështirë, ku ka filluar një “luftë civile”, (në thojza), midis qeverisë dhe opozitës.
Deklarata e Tajanit zhvlerëson deklarimet e bëra në Tiranë nga disa europarlamentarë, që preferuan të mbajnë në shënjestër opozitën, duke e paraqitur si problem, ndërsa anashkaluan atë që realisht mund të ndodhë, përplasjen jo vetëm në aspektin politik.
Një Europë me shumë probleme dhe para zgjedhjeve të majit, me një frikë që populistët apo ekstremistët në disa vende mund të dominojnë, gjë që mund të çojë në një konfigurim tjetër të Parlamentit Europian, duket e pafuqishme për të zgjidhur krizën politike në Shqipëri.
Me shumë gjasa pesha kryesore në këtë drejtim do ti mbetet Shteteve të Bashkuara. Ambasada në Tiranë drejtohet nga e dërguara me Punë, pa prezencën e një Ambasadori që pavarësisht emrit që do të kishte do të lëvizte më me energji se diplomatët europianë, përfshi këtu edhe atë të Bashkimit Europian.
Ndaj dhe duket se gjithçka do të luhet nga diplomacia amerikane.
Philip Reeker, një njohës i shkëlqyer i zhvillimeve në Rajon, përfshi edhe politikën shqiptare, do të marrë zyrtarisht detyrën e zv. Ndihmës Sekretarit amerikan të Shtetit për Europën më 18 mars, duke zëvendësuar në këtë funksion Wess Mitchell.
Reeker, një diplomat karriere ka shërbyer nga 2008 në 2011 si Ambasador i SHBA në Maqedoni dhe më pas nga 2011 deri në 2013 ka mbajtur pozicionin e zv.Ndihmës Sekretarit amerikan, post që do të rikthehet duke nisur nga 18 Marsi.
Në vitin 1999 ai ka shërbyer si zëdhënës i të dërguarit amerikan në negociatat e Rambujesë, ambasadorit Kristofer Hill, në 2003 dhe 2004 ka qenë zëdhënës i Departamentit të Shtetit, në vitin 2007 ka shërbyer në Hungari si zëvendës diplomat i parë në misionin e SHBA-së.
Reeker e njeh shumë mirë politikën shqiptarë, aktorët politikë, ka vizituar Shqipërinë, ka dhënë mesazhe të qarta sa herë politika shqiptare ka pasur tensione, ndërsa në një nga fjalimet e tij është shprehur “thelbi i demokracisë qëndron tek aftësia për të bërë kompromis”.
54-vjeçari Reeker është cilësuar si diplomati që “kryen punë”, çka do të thotë se një investim i tij mund të zgjdhë jo vetëm krizën politike në Shqipëri, por do të drejtojë normalizimin e marrëdhënieve mes Kosovës dhe Serbisë.
Dhe përveç kësaj mund të drejtojë procesin e anëtarësimit të Shqipërisë në BE dhe konsolidimin e doktrinës së re gjeoekonomike të ShBA-së në Lindjen e afërt e në Mesdheun lindor.