Arsimi profesional është përcaktuar si një ndër prioritetet kryesore të Ministrisë së Financave dhe Ekonomisë.
Në këtë kuadër, kjo e fundit ka hapur ditën e sotme procedurat e tenderimit për rikonstruksionin e tre shkollave të mesme profesionale në Gjirokastër, Kavajë dhe Elbasan.
Në total, fondi limit për këto investime kap shifrën e më shumë se 457.1 milionë lekëve.
Më konkretisht, do t’i nënshtrohet rikonstruksionit shkolla e Mesme Profesionale (Industriale) “Thoma Papapano” në Gjirokastër. Projekti përfshin shfrytëzimin e godinës së ish konviktit për funksion arsimor duke shtuar numrin e klasave, laboratorëve, apo ambienteve të tjera si dhe akomodimin e nxënësve në godinën e konvikti, e cila sot shfrytëzohet nga banorët si banesa private.
Po ashtu, propozimi parashikon edhe ndërhyrjen në sistemin e ri të oborrit, vendosjen e pllakave dekorative si dhe krijimin e një lulishteje me pemë, lule e stola. Godina e shkollës do të risuvatohet tërësisht, ndërsa do të pajiset më pas edhe me dyer e dritare të reja. Fondi limit i vënë në dispozicion për këtë investim kap vlerën e 146.4 milionë lekë, ndërsa kohëzgjatja e kontratës është parashikuar 26 javë nga nënshkrimi i saj.
Shkolla profesionale “Sali Ceka” në Elbasan është një tjetër godinë e cila do të restaurohet së shpejti. Janë një sërë ndërhyrjesh që janë parashikuar të kryhen në shkollën e cila ka aktualisht 600 nxënës të regjistruar. Punimet do të përqendrohen kryesisht në pjesën e tarracës, vendosjen e shtresës së pllakave të dyshemesë, pajisjen e godinës me dyer e dritare, ndërhyrje në fasadat e shkollës ekzistuese. Kështu, Ministria e Financave dhe Ekonomisë ka përcaktuar një fond limit pa TVSH me vlerë 155.3 milionë lekë për kryerjen e punimeve.
Ndërkohë, tenderi i tretë i hapur nga MFE është për rikonstruksionin e shkollës së Mesme Profesionale “26 Marsi” në qytetin e Kavajës, projekt për të cilin është në përcaktuar një fond limit prej më shumë se 155.4 milionë lekë. Kompleksi shkollor ka vetëm 1 godinë për mësimdhënie ku numërohen aktualisht 95 nxënës të regjistruar si dhe terrene sportive të patrajtuara. Krahas restaurimit të godinës ekzistuese, projekti përfshin njëkohësisht edhe shtesë ambientesh për të bërë të mundur mësimdhënie në kishte bashkëkohore.
Propozimi përfshin një sistemim të ri të oborrit me terrene sportive të hapura duke i dhënë rëndësi edhe gjelbërimit. Ashtu si në godinat e mësipërme, edhe në këtë shkollë do të kryhen punime për termoizolimin e tarracës, vendosjen e pllakave të dyshemesë, dyerve e dritareve si dhe elementë të tjerë shtesë. /Scan/
