Ndërkombëtarët kanë zgjedhur të bëjnë gjënë më të lehtë, t’i bëjnë presion palës më të dobët, në rastin konkret opozitës.
Kështu shprehet ish-ministri i Jashtëm, Besnik Mustafaj, në studion e Opinion në News 24, ndërsa i ka këshilluar opozitës që të tregohet e duruar në një situatë të tillë.
“Gjithmonë është më e lehtë ti bësh presion opozitës, këtë rrugë zgjedhin ndërkombëtarët, më të lehtën por edhe për faktin se është opozita ajo që ka braktisur parlamentin. Nuk ka ndonjë surprizë në sjelljen e tyre.
Nga opozita kërkohet një gjë esenciale, durimi. Nuk duhet aspak nervozizëm me ndërkombëtarët, pra duhet të jenë të durueshëm. Të bëjnë atë që se kanë bërë më parë, shpjegimin me argumente të vendimit të tyre. Pra, të tregojnë me fakte se masa ekstreme e marrë prej tyre nuk është kaprico”,theksoi Mustafaj.
Rrezikun e mos hapjes së negociatave, ish-ministri i Jashtëm Mustafaj nuk e lidh aspak me vendimin ekstrem të opozitës.
“Vendimi për çeljen e negociatave merret nga Këshilli i Ministrave të BE. Dekarata për gotën që shihet herë gjysmë plot dhe herë gjysëm bosh tregon se ky vendim do jetë negativ edhe në qershor, çfarëdo që të bëjë Shqipëria. Ministrat e jashtëm janë të njëjtët, asnjëri nuk ka ndryshuar, ashtu siç nuk kanë ndryshuar edhe opinionet e tyre”, tha Mustafaj.
