“Drejtësi, jo korrupsion” janë thirrjet e këtyre më shumë se 10 mijë protestuesve anti-qeveritarë në Bukuresht e qytete të tjera të Rumanisë.
Ata protestuan natën e të dielës përpara selisë së qeverisë për të kundërshtuar dekretin e emergjencës që ndërhyn në funksionimin e sistemit të drejtësisë.
Dekreti i emergjencës i nënshkruar nga kryeministrja socialdemokrate Viorika Dançila i heq të drejtën Prokurorit të Përgjithshëm Augustin Lazar të drejtojë hetimin ndaj ish-shefes së zyrës anti-korrupsion Laura Këvesi.
Në këtë mënyrë, kryeprokurori Lazar e ka të pamundur të pushojë hetimet për abuzim me detyrën ndaj Këvesit të nisura me kërkesë të socialdemokratëve në pushtet. Laura Këvesi u shkarkua Korrikun e vitit të kaluar si shefe e zyrës anti-korrupsion. Ajo shquhet për nisjen e proceseve të bujshme hetimore ndaj dhjetëra zyrtarëve socialdemokratë të akuzuar për korrupsion mes tyre edhe ish-kryeministrin Viktor Ponta.
Komisioni Europian ka akuzuar qeveritë e fundit socialdemokrate në Rumani se me ndërhyrjet e tyre në sistemin e drejtësisë po minojnë reformën në drejtësi, që i mundësoi hyrjen vendit në Bashkimin Europian në vitin 2007.
