Nga Boldnews.al
Opozita zhvilloi protestën e dytë rradhazi sot, ndërsa ajo që tërhoqi vëmendjen ishte se në këtë tubim, u rikthyen thirrjen “Liri-Demokraci”, “E duam Shqipërinë si gjithë Europa”.
Të dy këto thirrje të mijëra mbështetësve të opozitës janë të njëjtat që pushtuan sheshet dhe rrugët e Tiranës 29 vjet më parë, kur nisi edhe lëvizja demokratike kundër regjimit diktatorial.
Edhe sot ashtu si në lëvizjen e Dhjetorit ’90, drejtues të opozitës, janë pa mandate deputetësh, janë pjesë e turmave që kërkojnë ndryshim, janë të njëjtat simbole, dy gishtat, që rreth 18 muaj më parë u keqpërdorën nga Rama në fushatën për zgjedhjet e 25 qershorit.
Përballë tyre ndodhet Edi Rama, që ngjason me Adil Çarçanin, kryeministrin e fundit të regjimit diktatorial. Mediat italiane pasqyrojnë një intervistë të Kryeministrit Rama, i cili deklaron se zgjedhjet do të bëhen kur t’i vijë koha, ndërsa shton se nuk ka për të pasur as qeveri tranzitore. Pak a shumë e njëjta logjikë si Çarçani që deklarohej kundër lëvizjes demokratike të 1990 që kërkonte rrëzimin e diktaturës.
Rama sot flet se ka përballë establishmentin që e përmbysi me votë, ndërsa Adil Çarçani fliste për erërat që nuk do të lëkundnin qeverinë e tij, ku i referohej protestave anembanë vendit që zhvilloheshin në atë kohë.
Historia ka treguar se të gjithë Kryeministrat që deklaronin apo ndjeheshin të fortë politikisht dhe nuk dorëhiqeshin, largoheshin javë apo muaj më pas. Kjo i ndodhi edhe Adil Çarçanit, Ylli Bufit, Vilson Ahmetit, Fatos Nanos, kryeministrave që drejtuan qeveritë nga 1990-1992.
Kështu ndodhi më pas në 1997, 1998 apo 2002, me qeveritë e kohës që drejtoheshin nga Meksi, Nano, Majko apo Meta.
Sot në këtë pozicion ndodhet Edi Rama, që i duhet të përballet me protestat e opozitës. Sot ai ka gjithshka në dorë, përfshi edhe Kuvendin, që ka të njëjtën pamje si 1990, dikur me anëtarët e Komitetit Qendror dhe Byrosë, ndërsa sot me pasardhësit e tyre.
Dhe në krye kanë Gramoz Ruçin, ministrin e fundit të Brendshëm të PPSH-së, që mund të hyjë në histori si kryeparlamentari i parë që rrethoi Kuvendin me tela me gjemba dhe që deputetët e opozitës i kanë dorëzuar mandatet.
