Partia Demokratike do të mbledhë pasditen e sotme Këshillin Kombëtar për të zyrtarizuar vendimin e dorëzimit të mandateve të deputetëve.
Mbledhja e Këshillit Kombëtar pason atë të Kryesisë, e cila miratoi në unanimitet dorëzimin e mandateve.
Ndërkohë pritet që po pasditen e sotme, partia më e madhe opozitare, të ketë gati formatin individual të deklaratës për secilin deputet, ku përfshihet motivi politik për heqjen dorë nga mandate i deputetit.
Në deklaratë përveç vullnetit të shprehur nga secili prej deputetëve, renditen argumentet pse ligjvënësi heq dorë nga mandati, duke vënë theksin në motivin politik në këtë vendimmarrje.
Grupi parlamentar i PD-së ka 43 deputetë, të cilët pritet të plotësojnë dhe firmosin deklarimet për heqjen dorë nga mandati.
Formularët do të dorëzohen në Kuvendin e Shqipërisë, i cili ia përcjell më pas Komisionit Qendror të Zgjedhjeve, që duhet të plotësojë vakancën, duke respektuar renditjen në listën shumëemërore të depozituar nga subjekti politik në fjalë.
Idea për djegien apo dorëzimin e mandateve të deputetëve është hedhur rreth 1 vit më parë nga ish-Kryeministri Sali Berisha. Më pas kanë qenë deputetë të tjerë të PD që kanë artikuluar idenë për djegien e mandateve, ndërsa vetë kreu i PD-së, Lulzim Basha, hodhin propozimin më 17 shkurt, një ditë pas protestës së organizuar nga opozita përpara Kryeministrisë. Propozimi i Bashës u mirëprit nga aletatët e PD-së, përfshi edhe LSI-në, ndërsa tashmë pritet që gjithçka të realizohet përmes një proçesi teknik.
