Fitorja ndaj Laçit u duk se do t’i jepte fund krizës së Skënderbeut, por duket se korçarët janë sërish në të njëjtën gjendje. Korçarët pësuan një humbje me rezultatin 0-2 në transfertë me Flamurtarin, me këtë të fundit që mori tre pikë shumë të rëndësishme në takimin e vlefshëm për javën e 22-të të Kategorisë Superiore.
Që në sekondat e para të sfidës, Flamurtari ishte më dominues dhe bëri ligjin në fushë, duke qarkulluar topin dhe duke krijuar raste të pastra. Ishte Ribaj fillimisht që nuk arriti të mposhtë portierin Dajsinani me kokë, pasi goditja e tij u prit mjaft mirë nga portieri i ri.
Skuadra e Skënderbeut nuk arriti për asnjë moment të dalë në lojën e saj dhe Flamurtari rrezikoi sërish portën. Ishte Liçaj që nga një distancë e afërt nuk arriti të mposhtë Dajsinanin, i cili e priti sërish.
Në pjesën e dytë, Flamurtari vazhdoi të krijojë dhe loja e mirë e vlonjatëve u shpërblye. Në minutën e 64’, Ribaj i vjedh kohën portierit Dajsinani dhe arrin të ndëshkojë me kokë, duke zhbllokuar shifrat dhe duke i dhënë avantazhin kuqezinjve.
Shehi aktivizoi Oto Xhon në vend të mbrojtësi Sambu, duke rrezikuar gjithçka për gjithçka. Dhe ishte pikërisht sulmuesi ai që ishte protagonist. Krasniqi bën gjithçka mirë në minutën e 83’ dhe ishte shumë pranë golit, por Oto Xhon e prek atë top që po i drejtohej rrjetës, kur ishte në pozicion të parregullt. Flamurtari me fat dhe në minutat e fundit, Musta me një supergol siguroi tri pikët për djemtë e Dajës.
KATEGORIA SUPERIORE, JAVA 22
E diel, 17 shkurt ora 17:00
Stadiumi “Flamurtari”, Vlorë
FLAMURTARI – SKËNDERBEU 2-0
Shënues: Ribaj 64′, Musta 90+4′
Flamurtari: Koliçi, Ribaj (Beqaj 84′), Pollozhani, Veliu, Kotobelli, Liçaj, Rrapaj (Meraj 88′), Kale, Torasa (Ziaj 90′), Musta, Batha. Trajner: Ilir Daja
Skënderbeu: Dajsinani, Vangjeli, Sambu (Oto Xhon 78′), Pëllumbi, Abazi, Dita, Taipi, Sibo (Toskiç 46′), Muzaka (Gripshi 46′), Pervan, Krasniqi. Trajner: Orges Shehi
Gjyqtarë: Eldorjan Hamiti, Ridiger Cokaj, Ani Kociaj, Klodian Shahini
Kartonë të verdhë: Batha 13′ / Vangjeli 22’, Taipi 35′, Muzaka 37′
