Protesta e organizuar nga opozita në Tiranë kundër qeverisë Rama, që pritet të nisë sot në orën 11:00, ka shkaktuar një sjellje të çuditshme të Policisë së Shtetit.
Para tre ditësh, me një deklaratë të papreçedentë, policia njoftonte ndër të tjera për akte dhune në protest, gjë që më parë nuk kishte ndodhur në asnjë nga tubimet e thirrura, qoftë kjo kur në qeverisje ka qene PS ashtu edhe PD.
Së dyti, policia po tenton të bllokojë transmetimet direkte të televizioneve mbi protestën, edhe ky një rast i papreçedentë, në të paktën 15 vitet e fundit.
Së treti, punonjës të policisë së shtetit janë angazhuar për të filmuar dhe fotografuar qytetarët në rrethe të ndryshme të vendit, të cilët janë organizuar dhe po udhëtojnë drejt Tiranës.
Së katërti, dhe që përbën një tjetër rast të papreçedentë të sjelljes së policisë, është kërkesa për të pasur listat me emrat e qytetarëve që do të marrin pjesë në protestë.
Të gjitha këto sjellje të Policisë nën drejtimin e një ish-gjenerali ushtrie që drejton Ministrinë e Brendshme, po ndodhin për herë të parë dhe ndoshta përbëjnë një regres në raportet e vendosura deri më tani mes forcave të rendit dhe qytetarëve.
Për herë të parë, Ambasada e SHBA në Tiranë nuk ka përdorur thirrjen drejtuar qytetarëve amerikanë që jetojnë në Shqipëri për të shmangur protestën, sikundër ka ndodhur më parë, ndërsa i ka drejtuar një apel palëve që të shmangin dhunën.
Opozita nga ana e saj ka deklaruar se nuk do të ketë akte dhune, por do të jetë protesta më paqësore dhe më rezistente e 28 viteve.
E vetmja që paralajmëron dhunë është policia e Lleshit, nën urdhërat e Edi Rama. /Boldnews.al/
