Protesta e opozitës ka mbushur 5 orë, që nga momenti që ka nisur, ndërsa nuk kanë munguar incidentet.
Kjo do të mbahet mend si një nga protestat më masive, por edhe ajo në të cilën është përdorur një sasi e konsiderueshme gazi lotsjellës, si kurrë më parë në historinë e protestave shqiptare.
Disa mijëra qytetarë vijojnë të qëndrojnë në bulevard, ndërsa hera herës, nga lartësitë e godinave qeveritare hidhen gaz me synim shpërndarjen e tyre.
Deri më tani opozita dhe mbështetësit e saj po tregojnë vendosmëri për plotësimin e kërkesës për largimin e qeverisë, ndërsa në anën tjetër Kryeministri Edi Rama, duket se po shpërfill turmën e qytetarëve që ndodhen poshtë zyrës së tij.
Protestuesit herë pas here afrohen te dera qendrore e Kryeministrisë, por nuk kalojnë vijën, ose nuk tentojnë të hyjnë brenda godinës. Garda qëllon nga tarraca me gaz lotsjellës, skenë kjo që përsëritet herë pas here.
Ndoshta ky është momenti kur në lojë kanë hyrë ndërkombëtarët, që në distancë mund të kenë nisur negociatat mes pozitës dhe opozitës për gjetjen e një zgjidhjeve.
Në deklarimet publike, Ambasadat e akredituara në Tiranë, kanë dënuar rastet e dhunës, kanë shprehur mbështetjen për protestat demokratike, sikundër kanë bërë thirrje për qetësi./boldnews.al/
