Nga Boldnews.al
Gazi i përdorur gjatë protestës së sotme dyshohet se është klorin dhe klor pikrin me përqendrim të lartë, konfirmuan për “Boldnews” burime pranë grupit hetimor.
Bëhet fjalë lëndë të rrezikshme nga që më parë janë përdorur për stërvitje ushtarake, por që Bashkimi Europian i ka ndaluar kategorikisht të përdoren kundër civilëve.
Për më tepër, janë lëndë që zyrtarisht nuk përdoren nga policia, gaze me erë të fortë që krijojnë probleme të rënda në frymëmarrje deri në humbjen e vetëdijes dhe kanë rreze të lartë veprimi.
Të njëjtat burime shtuan se janë gjetur 5 nga bombolat e paplasura, të hedhura gjatë protestës nga garda dhe policia.
Mësohet gjithashtu se kanë nisur hetimet edhe për përdorimin e këtij lloji gazi, që është i ndaluar të përdoret ndaj popullsisë civile.
Përdorimi i gazit lotsjellës gjatë protestës së sotme ka sjellë dhjetëra persona të lënduar. Zyrtarisht, Ministria e Shëndetësisë njoftoi se 15 persona morën mjekime në spital për shkak të problemeve të shfaqura.
Përdorimi i gazit lotsjellës u dënua jo vetëm nga zyrtarë të opozitës, por edhe zëra të rëndësishëm të opinioni publik dhe ndërkombëtarët.
“Gazi lotsjellës konsiderohet një armë e cila ka të njëjtin efektet si tek protestuesit e dhunshëm ashtu tek ata që janë paqësor apo thjeshtë kalimtarë pa asnjë dallim. Për këtë arsye, kjo mënyrë përdoret vetëm nëse autoritetet e rendit dhe sigurisë e kanë të pamundur menaxhimin e dhunës së ushtruar dhe duhet të përdoret vetëm mbi personat e dhunshëm. Qëllimi i vetëm i përdorimit të kësaj lënde duhet të jetë shpërbërja e turmave por vetëm në ato raste kur turma ka mundësi për tu shpërbërë”, thuhet në një reagim të Amnesty International, organizatë jo fitimprurëse për të drejtat e njeriut.
