Fitorja ndaj Laçit mund të konsiderohet një pikënisje për Skënderbeun,që tashmë duhet të gjejë ekuilibrat e duhura dhe vazhdimësinë. Në Vlorë nuk lejohet gabimi pasi do të ishte një hap pas për kampionët, të cilët ndaj Flamurtarit kanë arritur të marin maksimumin në dy ndeshjet e luajtura deri më tani. Java e fundit tregoi një skuadër ambicioze, me shumë grintë e dëshirë për t’u rikthyer ekipi i 12 javëve të para. Përveç rezultatit është shumë e rëndësishme që Skënderbeu të ruajë ekuilibrat në lojë, ndërkohë që një tjetër fitore do t’i japë më shumë moral korçarëve. Orges Shehi ishte në pikëpyetje dhe konfirmimi i qëndrimit të tij erdhi falë fitores së fundjavës, sukses që shoqëroi ndryshimet në formacion.
Aldo Teqja humbi vendin e titullarit në favor të Dajsinanit, Pëllumbi bindi në qendër të mbrojtjes ndërkohë që u panë sinjale pozitive nga afrimet e janarit si kroati Marko Pervan dhe ganezi Kwasi Sibo, të cilët janë përshtatur mirë me skuadrën dhe idetë e trajnerit. Timonieri duhet ende të vijojë punën pa yllin e skuadrës Dejvi Bregu i cili këtë javë i është bashkuar grupit në stërvitje. Lajmi i mirë është rikthimi i kapitenit Marko Radas që i shton cilësi por dhe eksperiencë skuadrës që ndaj Laçit kishte një mesatare të ulët në moshë. Në Vlorë kërkohet vazhdimësia për t’i dhënë një mesazh rivalëve dhe kampionatit. Shifrat thonë që në periudhën e fundit gjithçka ka shkuar mirë në transfertë ndaj Flamurtarit. Në 5 ndeshjet e fundit të luajtura në Vlorë midis Kupës dhe kampionatit, Skënderbeu ka arritur të regjistrojë 4 fitore dhe një barazim, duke treguar se kjo është një transfertë e kalueshme.
