Kreu demokrat, Lulzim Basha, i ka drejtuar një thirrje shqiptarëve që të marin në dorë fatet e tyre, duke shtuar se pushteti nuk i përket një qeverie të kapur me mandate të vjedhura, por qytetarëve.
Nga Burreli, ku pati një mbështetje të gjerë, Basha theksoi se nga jugu në veri, qytetarët kanë një revoltë të fortë, ndaj një qeverie e cila vjedh paratë e shqiptarëve.
“Kjo është java vendimtare për Shqipërinë, për fatin evropian të shqiptarëve. Faleminderit për këtë temperaturë vere në ditë shkurti. Kam parë kudo që kam qenë varfërinë, tradhtinë, ku Edi Rama me bandën e hajdutëve kanë bërë ndaj çdo shqiptari.
Kam parë pamundësinë ekstreme të prindërve që nuk i sigurojnë dot fëmijëve bukën e gojës. Kriminelët në vend që të rrinë në burg, nxirren nga burgu nga kjo qeveri. Kjo është e përditshmja e kësaj qeverie.
Një palo-kryeministër, që rri sallave nuk di t’ia dijë për hallet tuaja. Sot ka shkuar thika në palcë.
Ky zgjim i shqiptarëve, i juaji këtu, jam i bindur se vjen në radhë të parë se njerëzit e kanë kuptuar se janë zot të fateve të tyre.
Qeveria është kapur duke vjedhur, Janë kapur duke vjedhur. Janë kapur duke vjedhur miliona euro në tendera me naftën, janë kapur duke vjedhur zgjedhjet me Gjushër dhe Abdylaj në të gjithë Shqipërinë.
Me 16 shkurt do t’i japim fund kësaj qeverie bandite.
Mos harroni se në anën tjetër të gardhit të policëve është kryehajduti që është kapur duke vjedhur lekët tuaja, paratë tuaja.
Kurrë populli pas 16 shkurtit nuk do të këtë frikë qeveritë, por qeveritë do ta kenë frikë atë. Të mos largohemi nga sheshi pa larguar sistemin e kalbur që iu vjedh çdo ditë. Një ditë e re do të agojë pë shqiptarët”, theksoi Basha.
